Success Story: दिवसभर मोबाईल कव्हर विकायचा, अन् रात्रभर अभ्यास; भाजी मंडईत काम करणाऱ्या मुलाने क्रॅक केली NEET

आयुष्यात परिस्थिती माणसाला खूप काही शिकवते. परिस्थितीमुळे माणूस बदलतो काहीतरी नवीन करायचं ठरवतो. ही परिस्थिती बदलण्याची ताकददेखील तुमच्यातच असते. असंच काहीसं झारखंडच्या एका मुलाने केलं आहे. मोबाईलचे कव्हर विकणाऱ्या मुलाने नीट (NEET) परीक्षा क्रॅक केली आहे.(Success Story)

झारखंडमधील जमशेदपूरच्या (Jamshedpur) एका मुलाने नीट परीक्षेत चांगले गुण मिळवले आहे. त्याचे डॉक्टर व्हायचे स्वप्न आहे आणि तो ते लवकरच पूर्ण करणार आहे.रोहित कुमार असं या मुलाचं नाव आहे. रोहित कुमारने नीटच्या परीक्षेत ५४९ गुण प्राप्त केले आहेत. त्याने नीट परीक्षेत ऑल इंडिया रँक १२,४८४ प्राप्त केली आहे. यानंतर त्याला आता सरकारी मेडिकल हॉस्पिटलमध्ये अॅडमिशन घ्यायचे आहेत.

याबाबत फिजिक्सवाला, यांनी एक व्हिडिओ शेअर केला आहे. या क्लासच्या उम्मीद बॅचच्या मुलांना मोफत कोचिंग दिले जाते. याच कोचिंग क्लासमधून रोहितने नीटचे प्रशिक्षण घेतले आणि आज त्याने नीट (NEET) क्रॅक केली आहे.

रोहित कुमारचे वडील भाजी मंडईत काम करायचे. बारावीनंतर त्याने एका वर्षाचा कालावधी घेतला आणि नीटची तयारी केली. कोरोना काळात त्याने मेडिकलमध्ये काम केले. तिथेच त्याला गोळ्या-औषधांबद्दल उत्सुकता निर्माण झाली.

रोहित हा दिवसभर फोन कव्हर विकायचा आणि रात्री ३ वाजेपर्यंत अभ्यास करायचा. दिवसा काम आणि रात्री अभ्यास असा त्याचा दिनक्रम होता. त्याच्या या मेहनतीमुळेच त्याला हे यश मिळालं आहे. त्यानंतर तो लवकरच मेडिकल कॉलेजमध्ये अॅडमिशन घेईल आणि डॉक्टर बनेल, असं त्याच्या कुटुंबाचे स्वप्न आहे.