Success Story: आधी इंजिनियरिंग; १२ लाखांच्या पॅकेजची नोकरी सोडली अन् UPSC दिली; IPS सईम रजा यांचा प्रवास

आयुष्यात काहीतरी करायचं असेल तर त्यासाठी मेहनत आणि जिद्द महत्त्वाची असते. तुम्ही मेहनत आणि जिद्दीच्या जोरावर यश मिळवू शकतात. त्यासाठी सातत्य असायला हवे.अशीच मेहनत सईम रजा यांनी केली. त्यांनी खूप मेहनतीने यूपीएससी परीक्षा पास केली. त्यांनी लाखो रुपयांची नोकरी सोडून स्पर्धा परीक्षा दिली. त्यांचे आयपीएस होण्याचे स्वप्न होते.

आईवडिलांच्या सपोर्टमुळे नोकरी सोडली

सईम रजा हे मूळचे मुजफ्फरपुर येथील रहिवासी होते. त्यांचे वडील स्टेट बँकेत काम करायचे. त्यांची आई गृहिणी आहेत.सईम यांनी आपल्या वडिलांच्या मदतीने यूपीएससी देण्याचा निर्णय घेतला. त्यांच्या कुटुंबियांनी त्यांच्यावर विश्वास ठेवला. त्यामुळे त्यांनी नोकरी सोडण्याचा निर्णय घेतला.

१२ लाखांची पगाराची नोकरी सोडली

सईम यांचे सुरुवातीचे शिक्षण मुजफ्फरपुर येथे झाले. पुढे ते इंजिनियरिंग करण्यासाठी बंगळुरु येथे गेले. त्यांनी बीटेकचे शिक्षण घेतले. यानंतर त्यांना चांगल्या पगाराची नोकरी मिळाली. ते बंगळुरुतील एका कंपनीत डेटा सायंटिस्ट पदावर काम करत होते. त्यांना १२ लाखांचे पॅकेज होते. त्यांनी जवळपास पाच वर्ष एका कंपनीत काम केले.

कोरोनामुळे सईम हे पुन्हा आपल्या घरी परतले. ते वर्क फ्रॉम होम करतात. परंतु तरीही त्यांना या कामात समाधान मिळत नव्हते. त्यामुळे त्यांनी यूपीएससी परीक्षा देण्याचा निर्णय घेतला. सईम यांनी लाखो रुपयांच्या पगाराची नोकरी सोडली. त्यांनी कोचिंग क्लासेसशिवाय यूपीएससी परीक्षेची तयारी सुरु केली.त्यांनी २०२३ मध्ये परीक्षा दिली आणि त्यांची आयपीएस पदावर निवड झाली.