HSRP Number Plate: वाहनचालकांना झटका! HSRP नंबरप्लेट बसवली नाही 'या' तारखेपासून कारवाई होणार; किती दंड भरावा लागणार?

वाहनचालकांसाठी महत्त्वाची बातमी आहे. देशातील सर्व वाहचालकांना एचएसआरपी नंबरप्लेट बसवणे अनिवार्य केले आहे. यासाठी ३१ डिसेंबरपर्यंतची मुदत होती. दरम्यान, आता डेडलाइन संपल्यानंतरही लाखो वाहनधारकांनी नंबरप्लेट बसवलेली नाही. त्यामुळे परिवहन विभाग अॅक्शन मोडमध्ये आला आहे. आता ज्या वाहनांना नंबरप्लेट नसेल त्यांच्यावर कारवाई केली जाणार आहे.

वाहनधारकांना एचएसआरपी नंबरप्लेट बसवणे अनिवार्य केले होते. अनेकांनी अजूनही हे काम केले नाही. त्यामुळे त्यांच्याकडून दंड वसूली केली जाणार आहे. १८ फेब्रुवारीपासून वाहनांवर कारवाई केली जाणार असल्याचे संकेत परिवहन आयुक्त विवेक भिमनगर यांनी दिले आहेत.

या तारखेपासून होणार कारवाई

वाहनधारकांनी ३१ डिसेंबरपूर्वी रजिस्ट्रेशन केले आहे परंतु त्यांना अजूनही नंबरप्लेट मिळालेली नाही. अशा वाहनधारकांसाठी प्रशासनाने १५ दिवसांची मुदत दिली आहे. या वेळेत नोंदणी करणे आवश्यक असल्याचे त्यांनी म्हटले आहे. त्यामुळेच १८ फेब्रुवारीनंतर कारवाई केली जाणार आहे.

पुणे आणि पिंपरी चिंचवडमध्ये लाखो वाहनधारकांनी अजूनही नंबरप्लेट बसवलेली नाही. जवळपास २४ लाखांहून अधिक वाहनधारकांना एचएसआरपी नंबरप्लेट बसवायची होती. मात्र, फक्त साडेआठ लाख वाहनधारकांनी एचएसआरपी नंबरप्लेट बसवली आहे. जवळपास ६५ टक्के वाहनधारकांनी नंबरप्लेट बसवलेली नाही.त्यामुळेच हा कारवाईचा बडगा उचलला आहे.

किती दंड भरावा लागणार? (HSRP Number Plate Fine)

एचएसआरपी नंबरप्लेट न बसवल्यास तुम्हाला रोख रक्कम दंड भरावा लागणार आहे. १,००० रुपयांपासून ते १०,००० रुपयांपर्यंत दंड तुम्हाला भरावा लागू शकतो.