Udaipur Dog Attack: शहरातील एका शांत कॉलनीत रविवारी सकाळी एक धक्कादायक घटना घडली आहे. केवळ आठ वर्षांचा एक चिमुकला मित्राच्या घरी खेळायला जात असताना अचानक काही भटक्या कुत्र्यांनी त्याच्यावर हल्ला चढवला. ही संपूर्ण घटना कॉलनीतील सीसीटीव्हीत कैद झाली असून, व्हिडिओ सोशल मीडियावर मोठ्या प्रमाणात व्हायरल होत आहे. या घटनेनंतर परिसरातील नागरिकांमध्ये भीतीचं वातावरण निर्माण झालं आहे.

सदर घटना राजस्थानमधील उदयपुरच्या एका परिसरातील आहे. जिथे आठ वर्षांचा चिमुकला नेहमीप्रमाणे आपल्या घराजवळील मित्राच्या घरी खेळायला जात होता. कॉलनीतील रस्त्यावर एकट्याने चालत असतानाच काही भटके कुत्रे अचानक त्याच्यावर धावून आले. काही क्षणांत त्यांनी त्याच्यावर जबरदस्त हल्ला(Dog Attack) चढवला. चिमुकल्याने मदतीसाठी आरडाओरडा केला, पण कुत्र्यांचा रोष काही कमी झाला नाही.

हल्ला झाल्याचा संपूर्ण प्रकार तेथील एका घरासमोर लावलेल्या सीसीटीव्हीत स्पष्टपणे कैद झाला आहे. व्हिडिओमध्ये दिसतं की चिमुकला चालत जात असताना दूरवरून कुत्र्यांची टोळी त्याच्या दिशेने धावत येते आणि काही सेकंदांत त्याला जमिनीवर पाडते. कुत्रे त्याच्या अंगावर चढून त्याला चावतात, अंगावर तडाखे मारतात. काही क्षणात आजूबाजूचे लोक आरवकडे धावत येतात आणि कुत्र्यांना पळवून लावतात. मात्र तोपर्यंत आरव गंभीर जखमी झाला होता.

या घटनेचा व्हिडिओ सोशल मीडियावर व्हायरल (Viral) झाला आहे आणि त्यावर अनेक नेटकऱ्यांनी पालिकेच्या बेफिकिरीवर नाराजी व्यक्त केली आहे. ट्विटर(एक्स), फेसबुक, इंस्टाग्रामसह अनेक प्लॅटफॉर्मवर लोकांनी "बालकांचं सुरक्षिततेचं काय?" असा सवाल उपस्थित केला आहे. काही नागरिकांनी तर या घटनेनंतर आपल्या मुलांना घराबाहेर सोडणंही बंद केल्याचं सांगितलं.

टीप: हा व्हिडीओ सोशल मीडियावर व्हायरल होत आहे. याची पडताळणी झालेली नाही. फक्त माहिती म्हणून आम्ही वाचक-प्रेक्षकांपर्यंत ही बाब पोहचवत आहोत. याचं आम्ही कोणत्याही प्रकारे समर्थन करत नाही.