Video : सोशल मीडियावर एक व्हिडीओ प्रचंड व्हायरल होत आहे. या व्हिडीओमध्ये जत्रेतील 'मौत का कुआ' हा खेळ पाहायला मिळत आहे. या मौत का कुआमध्ये एकजण खाली पडल्याचे पाहायला मिळते, तर मौत का कुआच्या सेटअपच्या सभोवतालच्या भिंतीवर दुचाकी वेगाने धावत असल्याचे दिसते. हा खाली जमिनीवर पडलेला व्यक्ती हा दुचाकीस्वार असल्याचे म्हटले जात आहे. दुचाकीवर स्टंट करणारा हा तरुण १५ फूटावरुन खाली पडल्याचा संशय व्यक्त केला जात आहे.

उत्तरप्रदेशातील महाराजगंज कोतवालीच्या थुथीबारी पोलीस स्टेशन परिसरातील प्रसिद्ध पंचमुखी शिव मंदिर येथे श्रावण निमित्त जत्रेचे आयोजन करण्यात आले आहे. या जत्रेमध्ये मौत का कुआचे आयोजन करण्यात आले होते. तेव्हा दुचाकीवर स्टंट करत असताना दुचाकीस्वाराचा अपघात झाला. हा तरुण दुचाकीवरुन खाली पडल्यानंतर सभोवतालच्या भिंतीवर दुचाकी वेगाने धावत राहिली. जखमी तरुणाला गोरखपूरमधील एका खासगी रुग्णालयात दाखल करण्यात आले आहे. त्याची प्रकृती गंभीर असल्याचे म्हटले जात आहे.

मिळालेल्या माहितीनुसार, श्रावण महिन्याच्या जत्रेत पंचमुखी शिव मंदिर इथिया येथे येणाऱ्या भाविकांच्या मनोरंजनासाठी प्रशासनाने मंदिर परिसरामध्ये बोली लावून मौत का कुआ बसवण्याची परवानगी दिली होती. परवानगी दिल्यानंतर सुरक्षा मानके न तपासल्याने हा अपघात झाल्याचा अंदाज वर्तवला जात आहे.

तरुण भिंतीवर फिरणाऱ्या दुचाकीवरुन खाली पडल्यानंतर मोठा गोंधळ उडाला. अपघातानंतरही दुचाकी सभोवतालच्या भिंतीवर फिरत होती. सुदैवाने तरुणाव्यतिरिक्त इतर कोणालाही दुखापत झाली नाही. या अपघातानंतर पोलीस घटनास्थळी दाखल झाले. ऑपरेटरकडून झालेल्या निष्काळजीपणामुळे अपघात झाल्याचे पोलिसांनी म्हटले आहे. या प्रकरणाचा तपास सुरु असल्याची माहिती समोर आली आहे.