Alibag Crime News:

अलिबागमध्ये एका धक्कादायक घटना घडली आहे. एका तरुणाला 8 ते 10 जणांनी मिळून भररस्त्यात मारहाण केली आहे. भाजारपेठेत दिवसाढवळ्या घडलेल्या या घटनेमुळे नागरिकांमध्ये काही प्रमाणात भीतीचं वातावरण पसरलं आहे. सदर घटनेत मारहाण झालेला तरुण गंभीर जखमी झाला असून त्याच्यावर रुग्णालयात उपचार सुरू आहेत.

मिळालेल्या अधिक माहितीनुसार, अभिराज पाटील असे जखमी तरूणाचे नाव आहे. त्याच्यावर सध्या अलिबाग येथील जिल्हा रुग्णालयात उपचार सुरुयेत. मारहाणीची घटना CCTV कॅमेऱ्यात कैद झाली असून बांधकाम साहित्य पुरवण्याच्या वादातून ही मारहाण झाल्याचे जखमी तरुणाचे म्हणणे आहे.

झिराड परिसरात फार्म हाऊस डेव्हलपिंगसाठी बंगल्यांची बांधकामे सुरू आहेत. तिथं बांधकाम साहित्य पुरवण्याचे काम स्थानिकांना मिळावे यासाठी संघर्ष सुरू होता. यातून स्थानिक तरुणाला मारहाण झाली आहे.

सीसीटीव्ही कॅमेऱ्यात कैद झालेल्या व्हिडीओमध्ये तुम्ही पाहू शकता की, तरुण बाजारपेठेत असाताना अचानक ९ ते १० जण त्याच्या दिशेने धावत आले. त्यानंतर त्यांनी तरुणावर लाकडी काठ्यांनी, दगडाने आणि बांबूने मारहाण करण्यास सुरूवात केली. यावेळी बाजारात मोठी गर्दी होती. वाहनांची देखील येजा सुरू होती. मात्र कोणीही या तरुणाला वाचवण्याचा प्रयत्न केला नाही.

तरुणाला रुग्णालयात दाखल केले असून त्याने माध्यमांशी संवाद साधला आहे. कामाचे काँट्रॅक्ट त्या व्यक्तींना हवे असते. जर मालकाने हे काम इतर कुणाला दिले तर हे लोक अशाच पद्धतीने मारहाण करतात आणि दहशत पसरवण्याचा प्रयत्न करतात, असं तरुणाने सांगितलं आहे.