अनेकदा प्रसिद्धीसाठी व्यक्ती नको ते स्टंट करतात ज्यामुळे प्रसिद्धीच नाही तर जीवाला धोका पोहचतो. विमान चालवताना वैमानिकाची जबाबदारी मोठी असते. प्रवाशांचा प्रवास सुरळीत व्हावा हे मुख्य लक्ष असते. वैमानिकाकडून जर विमान सुरू असताना एखादी चूक झाली तर विमानात बसलेल्या सर्व प्रवाशांचे जीव धोक्यात येऊ शकतात. ब्रिटनमध्ये असाच एक धक्कादायक प्रकार समोर आला आहे. जो पाहून तुमचाही जीव घाबरून जाईल.

लंडनच्या हीथ्रोहून न्यू यॉर्कला जाणाऱ्या विमानात वैमानिकाने जे केलं आहे ते पाहून विमानातील प्रवासी घाबरले आहेत. या पायलटने उड्डाणादरम्यान कॉकपिटचा दरवाजा उघडा ठेवला. पण हे वैमानिकाकडून चुकून झाले नाही तर हे त्याने जाणूनबुजून केले आहे. वैमानिकाला तो एक उत्कृष्ट पायलट असल्याचे त्यांच्या कुटुंबियाना दाखवून द्यायचे होते. मात्र यामुळे प्रवाशांच्या जीवाशी खेळ सुरू आहे की काय? असा प्रश्न उपस्थित होत आहे.

अपहरण तसेच दहशतवादाचा धोका कमी करण्यासाठी संपूर्ण उड्डाण प्रवासात कॉकपिटचे दरवाजे सहसा बंद ठेवले जातात. मिळालेल्या माहितीनुसार, कॅप्टनला त्याच्या कुटुंबाने, विमान प्रवासादरम्यान कॉकपिटचा ताबा घेताना पाहावे म्हणून त्याने हे केलं आहे. दरम्यान, ब्रिटिश एअरवेजच्या पायलटवर 'दहशतवादविरोधी कायद्यांचे उल्लंघन' केल्याबद्दल कारवाई करण्यात आली आहे.कॉकपिटचा दरवाजा उघडा ठेवण्याची पायलटची कृती प्रवाशांना तसेच क्रू मेंबर्सनाही घाबरवणारी होती.

सूत्रांच्या माहितीनुसार, 'ब्रिटिश एअरवेजचे सहकारी इतके चिंतेत होते की पायलटची अमेरिकेत तक्रार करण्यात आली आणि अधिकाऱ्यांना त्याला निलंबित करावे लागले.' ब्रिटिश एअरवेजच्या विमानातील क्रू मेंबर्सनी एअरलाइनला पायलटच्या कृतीची माहिती दिली. त्यानंतर त्याला निलंबित करण्यात आले. नागरी विमान वाहतूक प्राधिकरणाने या घटनेची तात्काळ चौकशी सुरू केली आहे.