India Tour of England : २० जून रोजी भारत विरुद्ध इंग्लंड या कसोटी सामन्यांच्या मालिकेला सुरुवात होणार आहे. शुभमन गिलच्या नेतृत्त्वात भारताचा संघ इंग्लंडला भिडणार आहे. दुसऱ्या बाजूला, भारताचा अंडर-१९ संघ २४ जूनपासून इंग्लंड दौऱ्यावरील पहिला सामना खेळणार आहे. पण सामन्यापूर्वी संघाला दुहेरी धक्के बसले आहेत.

भारताच्या अंडर १९ संघातील आदित्य राणा आणि खिलन पटेल हे दोन खेळाडू दुखापतग्रस्त झाले आहेत. हे दोन्ही खेळाडू दुखापतींमुळे इंग्लंड दौऱ्यातून बाहेर पडले आहेत. त्यांच्या जागी नव्या दोन खेळाडूंची घोषणा करण्यात आली आहे. ज्युनियर क्रिकेट समितीने इंग्लंड दौऱ्यासाठी आदित्य राणा आणि खिलन पटेल यांच्या जागी डी-दीपेश आणि नमन पुष्पक यांना संधी दिली आहे.

दीपेश आणि नमन हे भारताच्या इंग्लंड दौऱ्यासाठीच्या स्टँडबाय खेळाडूपैकी होते. बीसीसीआयच्या सेंटर ऑफ एक्सलन्स येथे सुरु असलेल्या एका कॅम्पमध्ये आदित्य राणाच्या पाठीच्या कण्यातील स्ट्रेस फॅक्चर झाला. तर खिलन पटेलच्या उजव्या पायाला दुखापत झाली आहे. त्यामुळे बीसीसीआयने दोन नव्या खेळाडूंना संधी दिली.

२२ मे रोजी इंग्लड दौऱ्यासाठी बीसीसीआयद्वारे भारताच्या अंडर-१९ संघाची घोषणा करण्यात आली. या संघाचे कर्णधारपद आयुष म्हात्रेकडे सोपावण्यात आले आहे. २४ जून रोजी दौऱ्यातील पहिला सामना खेळला जाणार आहे.

भारतीय अंडर १९ संघ (बदलीच्या घोषणेनंतर)

आयुष म्हात्रे (कर्णधार), वैभव सूर्यवंशी, विहान मल्होत्रा, मौल्यराजसिंह चावडा, राहुल कुमार, अभिज्ञान कुंडू (उपकर्णधार आणि डब्ल्यूके), हरवंश सिंग (डब्ल्यूके), आर.एस. अंबरीश, कनिष्क चौहान, हेनिल पटेल, युधाजित गुहा, मोहम्मद सिंह, प्रणवेंद्र सिंह, दीपेश सिंह, डी. नमन पुष्पक