Mumbai vs Rest Of India, Tanush Kotian: क्रिकेटमध्ये मुंबईकरांना खडूस का म्हणतात, याचं ताजं उदाहरण म्हणजे तनुष कोटियन. गोलंदाज असून आठव्या क्रमांकावर फलंदाजीला आणि रेस्ट ऑफ इंडियाच्या गोलंदाजांना सळो की पळो करुन सोडलं.

पहिल्या डावात ५०० धावांचा पल्ला गाठणाऱ्या मुंबईचा डाव दुसऱ्या डावात गडगडला. संघातील प्रमुख फलंदाज स्वस्तात माघारी परतला. सर्वांना वाटलं होतं की, इथून सामना फिरणार. मात्र तनुष कोटियन अवस्थीसोबत मिळून खेळपट्टीवर टिकून राहिला आणि मुंबईला मजबूत स्थितीत पोहोचवलं.

या सामन्यातील दुसऱ्या डावाबद्दल बोलायचं झालं, तर मुंबईचा संघ मोठी आघाडी घेऊन मैदानात उतरला. दुसऱ्या डावात पृथ्वी शॉ ने ७६ धावांची खेळी केली. तर आयुष म्हात्रेने १४ धावा केल्या.

त्यानंतर हार्दिक तोमोरे ७, अजिंक्य रहाणे ९,श्रेयस अय्यर ८,सरफराज खान १७ धावांवर माघारी परतला. १७१ धावांवर मुंबईचे ८ फलंदाज बाद झाले होते. इथून मुंबईचा डाव पूर्ण गडगडला. मात्र त्यानंतर तनुष कोटियनने अवस्थीसोबत मिळून मोर्चा सांभाळला. दोघांनी मिळून इराणी कप स्पर्धेत ९ व्या विकेटसाठी सर्वात मोठी भागीदारी करण्याचा रेकॉर्ड मोडून काढला. १३५ धावांची भागीदारी करताच हा रेकॉर्ड मोडला गेला.

तनुष कोटियनचं शतक

तनुष कोटियन हा आर अश्विन स्टाईल गोलंदाजी आणि हार्दिक पंड्या स्टाईल फलंदाजी करण्यासाठी ओळखला जातो. यापूर्वीही रणजी ट्रॉफी स्पर्धेत मुंबईचा संघ अडचणीत असताना, त्याने फलंदाजीत शानदार कामगिरी केली.

यावेळीही मुंबईला अशा एका खेळीची गरज होती, जी संघाला मजबूत स्थितीत पोहचवू शकेल. त्याने अवस्थीसोबत मिळून डाव सांभाळला, संघाला ३०० धावांचा पल्ला गाठून दिला आणि आपलं वैयक्तिक शतकही पूर्ण केलं. या खेळीच्या बळावर मुंबईचा संघ सध्या मजबूत स्थितीत आहे.

इराणी कपपमध्ये ९ व्या विकेटसाठी मोठी भागीदारी

तनुष कोटियन - अवस्थी- १३६*

रवी शास्त्री - कुलकर्णी - १३५

सुनील गावसकर - बिशन सिंग बेदी- १०९