पंजाब किंग्जविरुद्ध झालेल्या सामन्यात चेन्नई सुपर किंग्ज संघाला एकतर्फी पराभवाचा सामना करावा लागला आहे. प्रथम फलंदाजी करताना चेन्नई सुपर किंग्ज संघाने २० षटकअखेर ७ गडी बाद १६२ धावा केल्या. या धावांचा पाठलाग करताना पंजाब किंग्ज संघाने १७.५ षटकात ७ गडी राखून हे आव्हान पूर्ण केलं. दरम्यान या सामन्यातील पराभवानंतर चेन्नई सुपर किंग्ज संघाचा कर्णधार ऋतुराज गायकवाडने पराभवाचं कारण सांगितलं आहे.

या सामन्यातील पराभवानंतर ऋतुराज गायकवाड (Ruturaj Gaikwad) म्हणाला की,' या खेळपट्टीवर आम्ही २०० धावा करायला हव्या होत्या. मात्र आम्ही १८० धावा देखील करू शकलो नाही. यासह दिपक चाहर पहिल्याच षटकात दुखापतग्रस्त झाला. त्यामुळे त्याला मैदान सोडावं लागलं. त्यानंतर आमच्या संघात केवळ २ गोलंदाज शिल्लक होते. त्यात दव आल्याने गोलंदाजांची डोकेदुखी आणखी वाढली. हा सामना आमच्यासाठी खूप कठीण होता. इथून पुढे आमचे ४ सामने शिल्लक आहेत. आम्ही कमबॅक करण्याचा प्रयत्न करू.'

या सामन्याबद्दल बोलायचं झालं, तर पंजाब किंग्ज संघाने नाणेफेक जिंकला आणि प्रथम गोलंदाजी करण्याचा निर्णय घेतला. चेन्नई सुपर किंग्ज संघाकडून प्रथम फलंदाजी करताना ऋतुराज गायकवाडने सर्वाधिक ६२ धावांची खेळी केली. तर उर्वरीत कुठल्याही खेळाडूला मोठी खेळी करता आली नाही. चेन्नईला २० षटक अखेर ७ गडी बाद १६२ धावा करता आल्या.

पंजाब किंग्ज संघाला हा सामना जिंकण्यासाठी १६३ धावांची गरज होती. या धावांचा पाठलाग करताना जॉनी बेअरस्टोने ४६ धावांची खेळी केली. तर रुसोने ४३ धावा केल्या. हा सामना पंजाबने ७ गडी राखून आपल्या नावावर केला.