RCB Vs CSK Highlights : चेन्नईच्या एमपी चिदंबरम स्टेडियममध्ये आयपीएल २०२५ मधला रॉयल चॅलेंजर्स बंगळुरू विरुद्ध चेन्नई सुपर किंग्स हा सामना खेळला गेला. या सामन्यामध्ये आरसीबीने ५० धावांनी सीएसकेवर विजय मिळवला. या सामन्यादरम्यान बंगळुरूचा विकेटकिपर बॅट्समन जितेश शर्माचा एक व्हिडीओ सोशल मीडियावर व्हायरल झाला.

शेवटच्या ओव्हरमध्ये जितेश शर्मा फलंदाजीसाठी मैदानामध्ये उतरला. त्याने ६ बॉल्समध्ये १२ धावा केल्या. सतराव्या ओव्हरमध्ये खलिल अहमदच्या बॉलवर तो बाद झाला. तो ड्रेसिंग रुममध्ये परतत असताना चेपॉक स्टेडियममधील डिजेने डोसा इडली सांबर चटणी हे व्हायरल गाणं लावून जितेशला ट्रोल करण्याचा प्रयत्न केला.

जितेशला ट्रोल का करण्यात आले?

आरसीबीच्या सोशल मीडिया अकाउंटवर एक व्हिडीओ पोस्ट करण्यात आला होता. त्यामध्ये बंगळुरूच्या खेळाडूंना सीएसकेबद्दल काय वाटते? असा प्रश्न विचारण्यात आला होता. त्यावर अनेकांनी वेगवेगळ्या प्रतिक्रिया दिल्या. पण जितेश शर्माने सीएसकेला उद्देशून 'डोसा.. इडली.. सांबर.. चटणी..' असे म्हटले होते. या प्रतिक्रियेवरुन जितेशला सीएसकेच्या फॅन्स ट्रोल करायला सुरुवात केली होती.

सामन्यात काय घडलं?

बंगळुरूसाठी कर्णधार रजत पाटीदारने सर्वाधिक ५१ धावा करत महत्त्वाची भूमिका बजावली. त्याला फिल सॉल्ट, विराट कोहली आणि देवदत्त पडिकलची चांगली साथ मिळाली. पहिल्या डावात खेळताना, रॉयल चॅलेंजर्स बंगळुरूने २० षटकांत ७ गडी गमावून १९६ धावा केल्या. चेन्नईच्या गोलंदाजांमध्ये नूर अहमदने ३ तर पाथिराणाने २ विकेट्स घेतल्या.

१९७ धावांचे लक्ष्य गाठण्यासाठी चेन्नईचे खेळाडू मैदानात उतरले. सलामीवीर रचिन रवींद्रने काही काळ टिकून खेळ केला, मात्र दुसऱ्या बाजूला सीएसकेच्या मधल्या फळीतले फलंदाज लागोपाठ बाद झाले. रवींद्र जडेजा आणि शिवम दुबे यांनी संघ सावरण्याचा प्रयत्न केला, पण बंगळुरूच्या प्रभावी गोलंदाजीसमोर चेन्नईच्या फलंदाजांना टिकाव धरता आला नाही. अखेरीस, चेन्नईने २० षटकांत फक्त १४६ धावा केल्या आणि सामना गमावला.