Puneri Paltan vs Haryana Steelers, Pro Kabaddi Season 10 Final:

ज्या क्षणाची गेल्या २ महिन्यांपासून आतुरतेने वाट पाहीली जात होती तो क्षण अखेर आला आहे. हैदराबादच्या मैदानावर प्रो कबड्डीच्या १० व्या हंगामातील अंतिम सामना रंगणार आहे. या सामन्यात पुणेरी पलटण आणि हरियाणा स्टीलर्स हे दोन्ही संघ आमने सामने येणार आहेत. दोन्ही संघांना प्रो कबड्डीची पहिली ट्रॉफी जिंकण्याची संधी असणार आहे. दरम्यान जाणून घ्या सामन्याबद्दल सर्वकाही.

अस्लम इनामदारच्या नेतृत्वाखाली खेळणाऱ्या पुणेरी पलटणने सलग दुसऱ्यांदा प्रो कबड्डीच्या फायनलमध्ये प्रवेश केला आहे. स्पर्धेतील सेमीफायनलमध्ये पुणेरी पलटणने पटना पायरेट्सला ३७-२१ ने पराभूत केलं होतं. गतवर्षी झालेल्या अंतिम सामन्यात पुणेरी पलटण आणि जयपूर पिंक पँथर्स हे दोन्ही संघ आमने सामने आले होते. मात्र या सामन्यात पुणेरी पलटणला पराभवाचा सामना करावा लागला होता. यावेळी पुणेरी पलटणला जेतेपद पटकावण्याची आणखी एक संधी मिळाली आहे. (Cricket news in marathi)

इथे पाहा लाईव्ह...

प्रो कबड्डीच्या १० व्या हंगामातील अंतिम सामना भारतीय वेळेनुसार रात्री ८ वाजता रंगणार आहे. या सामन्याचे लाईव्ह प्रक्षेपण स्टार स्पोर्ट्सवर केले जाणार आहे. यासह हे सामने डिस्नी प्लस हॉटस्टार आणि हॉटस्टारच्या वेबसाईटवर देखील पाहता येणार आहे.

हरियाणा स्टीलर्सचा संघ प्रो कबड्डीच्या इतिहासात पहिल्यांदाच फायनलमध्ये पोहोचला आहे. हरियाणा स्टीलर्सने स्पर्धेतील सेमीफायनलमध्ये जयपुर पिंक पँथर्स संघाला ३१-२७ ने पराभूत करत फायनलमध्ये आपलं स्थान निश्चित केलं होतं.