टी-२० वर्ल्डकप २०२४ स्पर्धेला जोरदार सुरुवात झाली आहे. यजमान अमेरिका आणि कॅनडा या दोन्ही संघांमध्ये झालेल्या सामन्याने या स्पर्धेला प्रारंभ झाला आहे. भारतीय संघ ५ जून रोजी आपला पहिला सामना पाकिस्तानविरुद्ध खेळणार आहे. त्यानंतर ९ जून रोजी भारत-पाकिस्तान सामन्याचा थरार पार पडणार आहे. हा सामना पाहण्यासाठी अनेक दिग्गज सेलिब्रिटी हजर राहणार असल्याची चर्चा सुरु आहे. दरम्यान या सामन्यापूर्वी पाकिस्तानचा कर्णधार बाबर आझम टेन्शनमध्ये असल्याचं दिसून येत आहे.

भारत- पाकिस्तान सामन्यापूर्वी काय म्हणाला बाबर आझम?

भारत आणि पाकिस्तान हे दोन्ही संघ जेव्हा जेव्हा आमने सामने येतात तेव्हा क्रिकेट चाहत्यांना अॅक्शनपॅक सामना पाहायला मिळत असतो. २०२२ मध्ये जेव्हा हे दोन्ही संघ आमनेसामने आले होते. त्यावेळी शेवटच्या चेंडूवर निकाल लागला होता. बाबर आझम या सामन्यापूर्वी टेन्शनमध्ये असल्याचं म्हटलं जात आहे.

बाबर आझम घाबरला तर आहे, मात्र भारतीय संघाला आव्हान देण्यासाठी त्याने प्लानही सांगितला आहे. तो म्हणाला की, ' खेळातील बेसिक गोष्टी फॉलो करणं हा प्रेशरमधून बाहेर पडण्याचा सर्वात सोपा मार्ग आहे.' या सामन्यापूर्वी बेसिक गोष्टी आणि स्किल्सवर काम करणार असल्याचं बाबर आझमने म्हटलं आहे.

टी-२० वर्ल्डकपमध्ये कसा राहिलाय दोन्ही संघांचा रेकॉर्ड?

टी-२० वर्ल्डकप स्पर्धेत दोन्ही संघांमध्ये एकापेक्षा एक रोमांचक सामने पाहायला मिळाले आहेत. नेहमी भारताचा संघ पाकिस्तानवर भारी पडला आहे. आयसीसी टी-२० वर्ल्डकप २०२४ स्पर्धेसाठी दोन्ही संघांचा ग्रुप ए मध्ये समावेश करण्यात आला आहे. हे दोन्ही संघ ९ जून रोजी आमनेसामने येणार आहेत. या दोन्ही संघांचा रेकॉर्ड पाहिला, तर दोन्ही संघ ७ वेळेस आमनेसामने आले आहेत. यादरम्यान भारतीय संघाने ५ सामन्यांमध्ये बाजी मारली आहे. तर १ सामना अनिर्णित राहिला आहे आणि एका सामन्यात भारतीय संघाला पराभवाचा सामना करावा लागला आहे.