पॅरिस पॅरालिम्पिक स्पर्धेत भारतीय खेळाडूंची शानदार कामगिरी सुरूच आहे. गुरुवारी (५ सप्टेंबर) भारताला आणखी एक पदक मिळालं आहे. कपिल परमारने पुरुषांचा ६० कीलोग्रम (J 1) वजनी गटातील ज्युदो क्रीडा प्रकारात कांस्य पदकाला गवसणी घातली आहे. यासह त्याने इतिहास रचला आहे.

तो ज्युदोमध्ये भारतासाठी पदक जिंकणारा पहिलाच खेळाडू ठरला आहे. कांस्य पदकासाठी झालेल्या सामन्यात कपिल परमार आणि एलिल्टोन ओलिवेराला धूळ चारली. हे पदक भारताचं पॅरिस पॅरालिम्पिक स्पर्धेतील २६ वे पदक ठरले आहे.

असा जिंकला सामना

कपिल परमार सुरुवातीपासूनच ओलिवेरावर वरचढ दिसला. त्याने दमदार सुरुवात केली आणि शेवटही तसाच केला. यासह त्याने १०-० ने विजय मिळवत कांस्य पदकावर कब्जा केला.

J 1 कॅटेगरी म्हणजे काय?

पॅरालिम्पिक स्पर्धेत अपंगत्वाची कॅटेगरी ठरवण्यात आली आहे . J 1 कॅटेगरी म्हणजे जे खेळाडू दृष्टीहीन आहेत किंवा ज्यांना कमी दिसतं, अशा खेळाडूंचा या कॅटेगरीत समावेश केला जातो.

पंतप्रधान नरेंद्र मोदींनी दिल्या शुभेच्छा

भारतासाठी ज्युदोमध्ये पहिलं पदक जिंकल्यानंतर कपिलवर कौतुकाचा वर्षाव केला जातोय. भारताचे पंतप्रधान नरेंद्र मोदी यांनी देखील आपल्या एक्स अकाऊंटवर पोस्ट शेअर करत त्याचं अभिनंदन केलं आहे. त्यांनी लिहिलं की, ' खूपच शानदार कामगिरी आणि एक स्पेशल पदक. कपिल परमार ज्युदोमध्ये पदक जिंकणारा पहिलाच भारतीय ठरला आहे. पुरुषांचा ६० कीलोग्रम (J 1) वजनी गटातील ज्युदो क्रीडा प्रकारात कांस्य पदक जिंकल्याबद्दल तुमचे अभिनंदन.'

लहानपणी घडली दुर्घटना

कपिल परमारबद्दल बोलायचं झालं, तर तो मध्य प्रदेशातील शिवोर या छोट्या गावात राहतो. लहानपणीच त्याच्यासोबत एक मोठी दुर्घटना घडली होती. शेतात गेला असताना, त्याला पाण्याच्या मोटरचा झटका बसला. या धक्क्यानंतर तो बेशुद्ध झाला. त्याला रुग्णालयात घेऊन जाण्यात आलं, त्यावेळी तो ६ महिने कामामध्ये होता. त्याचे वडील टॅक्सी चालक आहेत.