Royal Challengers Bengaluru : आयपीएलच्या नव्या सीझनला आज सुरुवात होणार आहे. पहिल्या सामन्यात गतविजेता संघ कोलकाता नाईट रायडर्सचा सामना रॉयल चॅलेंजर्स बंगळुरूशी होणार आहे. मागील अठरा वर्षांपासून चांगली कामगिरी करुनही बंगळुरूच्या संघाला ट्रॉफी जिंकणे शक्य झाले नाही. यावरुन संघाला अनेकदा ट्रोल देखील केले जाते. दरम्यान बंगळुरूचा संघ पॉईंट टेबलवर शेवटच्या स्थानी करण्याबाबत अ‍ॅडम गिलख्रिस्ट यांनी भविष्यवाणी केली.

क्लब प्रेयरी फायर पॉडकास्टमध्ये गिलख्रिस्टने हजेरी लावली. 'आरसीबी पॉईंट टेबलवर शेवटच्या स्थानी राहील असे मला वाटते. त्यांच्या संघात बरेचसे इंग्लिश खेळाडू (इंग्लंडचे खेळाडू) आहेत या फॅक्टच्या आधारे मी हे बोलू शकतो', असे वक्तव्य अ‍ॅडम गिलख्रिस्ट यांनी केले. माजी इंग्लिश क्रिकेटपटू मायकल वॉन यांच्यासह गिलख्रिस्ट क्लब प्रेरी फायर पॉडकास्ट होस्ट करतात.

'मी विराट कोहलीच्या विरोधात किंवा त्याच्या चाहत्यांच्या विरोधात काही बोलत नाही. उलट मी चाहत्यांची माफी देखील मागतो, पण तुम्हाला तुमच्या रिक्रूटिंग एजंटशी बोलावे लागेल' असे अ‍ॅडम गिलख्रिस्ट यांनी म्हटले. मायकल वॉन यांची मस्करी करण्यासाठी गिलख्रिस्टने हे विधान थट्टेने केल्याचे म्हटले जात आहे.

रॉयल चॅलेंजर्स बंगळुरूचा आयपीएल फायनलमध्ये पराभव करणारे अ‍ॅडम गिलख्रिस्ट हे पहिले कर्णधार आहेत. २००९ मध्ये आरसीबीने पहिल्यांदा आयपीएलच्या फायनलमध्ये स्थान मिळवले होते. तेव्हा अ‍ॅडम गिलख्रिस्ट यांच्या नेतृत्त्वात डेक्कन चार्जर्स संघाने बंगळुरूच्या संघावर विजय मिळवला होता.