Arjun Tendulkar, IPL 2025 Mega Auction: भारताचा मास्टर ब्लास्टर सचिन तेंडुलकरचा मुलगा अर्जुन तेंडुलकर गेल्या २ हंगामांपासून मुंबई इंडियन्स संघाकडून खेळतोय. मुंबईने बेस प्राईजवर त्याला आपल्या संघात स्थान दिलं. यादरम्यान त्याला पदार्पणाची संधीही दिली.

मात्र आगामी हंगामापूर्वी मुंबई इंडियन्सने त्याला रिलीज करण्याचा निर्णय घेतला आहे. मात्र गेल्या दोन्ही हंगामातील रेकॉर्ड पाहिला, तर मुंबई इंडियन्स पुन्हा अर्जुनला आपल्या ताफ्यात घेणार अशी शक्यता वर्तविली जात आहे. मात्र यावेळी केवळ मुंबई इंडियन्स नव्हे, तर आणखी काही संघ त्याला आपल्या ताफ्यात घेण्यासाठी जोर लावू शकतात. कोणते आहेत ते संघ? जाणून घ्या.

गुजरात टायटन्स

अर्जुन तेंडुलकरला मुंबईच्या प्लेइंग ११ मध्ये सातत्याने संधी दिली जात नाहीये. तर दुसरीकडे गुजरातचा हेड कोच आशीष नेहरा अशा खेळाडूंना संधी देतो, ज्यांना जास्त संधी मिळत नाहीये. नेहराने मोहित शर्मावर विश्वास दाखवला होता. हा विश्वास त्याने सार्थ ठरवत दमदार कामगिरी केली होती. त्यामुळे यावेळी गुजरातचा संघ अर्जुनला आपल्या संघात घेण्यासाठी जोर लावू शकतो.

चेन्नई सुपर किंग्ज

चेन्नई सुपर किंग्जचा माजी कर्णधार एमएस धोनीने अनेक खेळाडूंना घडवलं आहे. ज्यात दिपक चाहरसारख्या खेळाडूंचा समावेश आहे. यावेळी तो कदाचित आपल्या आयपीएल कारकिर्दीतील शेवटचं हंगाम खेळणार आहे. त्यामुळे जर चेन्नईने अर्जुनला आपल्या संघात घेतलं, तर हे अर्जुनसाठी चेन्नई सुपर किंग्ज संघासाठीही फायद्याचं ठरेल.

कोलकाता नाईट रायडर्स

कोलकाता नाईट रायडर्सने गेल्या वर्षी आयपीएलची ट्रॉफी उंचावली होती. यावेळी चंद्रकांत पंडीत हे प्रशिक्षकाच्या भूमिकेत असणार आहेत. त्यांनी देखील अनेक युवा खेळाडूंना संधी दिली आहे. मुख्य बाब म्हणजे शाहरुख खान आणि सचिन तेंडुलकर हे दोघेही खूप चांगले मित्र आहेत.