आयपीएल २०२५ स्पर्धेचा बिगुल वाजला आहे. या स्पर्धेच्या वेळापत्रकाची घोषणा करण्यात आली आहे. स्पर्धेतील पहिला सामना २२ मार्चला गतविजेता कोलकाता नाईट रायडर्स आणि रॉयल चॅलेंजर्स बंगळुरु या दोन्ही संघांमध्ये रंगणार आहे.

त्यानंतर २३ मार्चला ५ वेळचा चॅम्पियन संघ मुंबई इंडियन्स आणि ५ वेळचा चॅम्पियन संघ चेन्नई सुपर किंग्ज संघ मैदानात उतरणार आहे. दरम्यान या सामन्यापूर्वी मुंबई इंडियन्सला मोठा धक्का बसला आहे.

हार्दिक पंड्या पहिल्या सामन्याला मुकणार?

आयपीएल २०२५ स्पर्धेत मुंबई इंडियन्सचा संघ प्लेऑफमध्ये प्रवेश करु शकला नव्हता. या हंगामातील साखळी फेरीतील शेवटच्या सामन्यात मुंबई इंडियन्स आणि लखनऊ सुपर जायंट्स हे दोन्ही संघ आमनेसामने आले होते. या सामन्यात स्लो ओव्हर रेटमुळे हार्दिकवर ३० लाखांचा दंड आकारला गेला होता, तर एक सामना खेळण्यावर बंदीही घातली गेली होती.

याच कारणामुळे तो आयपीएल २०२५ स्पर्धेतील पहिला सामन्यात खेळताना दिसून येणार नाही. मुंबईचा पहिला सामना चेन्नईविरुद्ध होणार आहे. त्यानंतर २९ मार्चला गुजरातविरुद्ध होणाऱ्या सामन्यात हार्दिक कमबॅक करताना दिसेल.

आयपीएलकडून प्रसिद्ध करण्यात आलेल्या प्रेस रिलिझमध्ये म्हटले गेले होते की,' मुंबई इंडियन्स संघाचा कर्णधार हार्दिक पंड्यावर, १७ मे रोजी मुंबईतील वानखेडे स्टेडियमवर लखनऊ सुपर जायटंस् विरुद्ध झालेल्या सामन्यादरम्यान स्लो ओव्हर रेटमुळे कारवाई करण्यात आली आहे. हार्दिक पंड्यावर ३० लाखांचा दंड आकारण्यात आला. यासह पुढील सामना खेळण्यावर बंदी घालण्यात आली आहे.'

हार्दिकच्या अनुपस्थितीत कोण होणार कर्णधार?

मुंबई इंडियन्स संघात अनेक स्टार खेळाडूंची भरमार आहे. गेल्या हंगामात रोहित शर्माला कर्णधारपदावरुव काढून ही जबाबदारी हार्दिक पंड्याकडे सोपवण्यात आली होती. हार्दिक जर बाहेर बसला, तर रोहित शर्मा, सूर्यकुमार यादव आणि जसप्रीत बुमराहसारखे अनुभवी खेळाडू आहेत, जे ही जबाबदारी खांद्यावर घेऊ शकतात. जसप्रीत बुमराह भारतीय कसोटी संघाचा उपकर्णधार आहे. तर सूर्यकुमार यादव टी-२० संघाचा कर्णधार आहे. रोहित शर्मा वनडे संघाचा कर्णधार आहे. त्यामुळे या तिघांपैकी कुठलाही खेळाडू कर्णधारपदाची जबाबदारी घेऊ शकतो.