आयपीएल २०२५ चा दुसरा सामना सुरु आहे. सनरायजर्स हैदराबाद आणि राजस्थान रॉयल्स यांच्यात हा सामना खेळला जात आहे. हैदराबादच्या प्लेईंग ११ मध्ये अनिकेत वर्मा या २३ वर्षीय खेळाडूला संधी देण्यात आली आहे. अनिकेत वर्माने खूप संघर्ष करुन आयपीएलमध्ये स्थान मिळवले आहे. त्याने एमपी प्रीमियर लीगमध्ये दमदार कामगिरी केली होती.

अनिकेत वर्मा मध्यप्रदेशच्या भोपालचा आहे. अनिकेत ३ वर्षांचा असताना त्याच्या आईचे निधन झाले. वडिलांनी दुसरं लग्न केल्याने अनिकेत बालपणीच पुरका झाला. अनिकेतच्या काकाने त्याचा सांभाळ केला. ज्यावेळेस अनिकेत १० वर्षांचा होता, तेव्हा काकाने एका क्रिकेट अकॅडमीमध्ये त्याला दाखल केले. हालाखीच्या स्थितीमध्ये अनिकेत वर्माचे बालपण गेले. अनिकेतचे क्रिकेटचे स्वप्न पूर्ण करण्यासाठी त्याच्या काकाने खूप मेहनत घेतली.

आयपीएल २०२५ च्या मेगा ऑक्शनमध्ये हैदराबादच्या संघाने अनिकेत वर्मावर ३० लाख रुपयांची बोली लावली. प्रॅक्टिस मॅचमध्ये त्याने तुफानी खेळी केली. त्याने कामिंदू मेंडिसच्या ओव्हरमध्ये चार बॉल्समध्ये सलग चार षटकार मारले होते. त्याने फक्त १७ चेंडूंमध्ये ४६ धावा करत स्वत:ची क्षमता सिद्ध करुन दाखवली.

एमपी प्रीमियर लीगमध्ये अनिकेत वर्मा चमकला होता. त्याने फक्त ३२ चेंडूंमध्ये १०० धावा केल्या होत्या. आजच्या राजस्थान रॉयल्स विरुद्ध सनरायजर्स हैदराबाद सामन्यामध्ये अनिकेतचा समावेश करण्यात आला आहे. आयपीएलमध्येही अनिकेत चांगली फलंदाजी करेल अशी सनरायजर्स हैदराबादच्या संघाला आशा आहे.