आयपीएल २०२४ स्पर्धेतील ४६ व्या सामन्यात चेन्नई सुपर किंग्ज आणि सनरायझर्स हैदराबाद हे दोन्ही संघ आमने सामने आले होते. आपल्या होम ग्राऊंडवर खेळताना चेन्नईने विजयी घोडदौड सुरु ठेवत सनरायझर्स हैदराबाद संघाला पाचव्यांदा पराभूत केलं आहे. या सामन्यात प्रथम फलंदाजी करताना चेन्नई सुपर किंग्ज संघाने २१३ धावा केल्या होत्या. या धावांचा पाठलाग करताना सनरायझर्स हैदराबाद संघाला अवघ्या १३४ धावा करता आल्या. दरम्यान या सामन्यात सनरायझर्स हैदराबाद संघाला ७८ धावांनी पराभवाचा सामना करावा लागला आहे.

चेन्नईची मोठी झेप...

या सामन्यातील विजयाचा चेन्नई सुपर किंग्ज संघाला मोठा फायदा झाला आहे. हा संघ गुणतालिकेत सहाव्या स्थानाहून थेट तिसऱ्या स्थानी पोहोचला आहे. तर या सामन्यापूर्वी तिसऱ्या स्थानी असलेला सनरायझर्स हैदराबादचा संघ चौथ्या स्थानी सरकला आहे. सध्या गुणतालिकेत १० गुण असलेले ५ संघ आहेत. ज्यात चेन्नई सुपर किंग्जसह, कोलकाता नाईट रायडर्स, लखनऊ सुपरजायंट्स, सनरायझर्स हैदराबाद आणि दिल्ली कॅपिटल्स संघाचा समावेश आहे.

ऑरेंज कॅपच्या शर्यतीत कोणता संघ आघाडीवर?

चेन्नई सुपर किंग्ज विरुद्ध सनरायझर्स हैदराबाद संघाविरुद्ध झालेल्या सामन्यात ऋतुराज गायकवाडने ९८ धावांची खेळी केली. या खेळीनंतर ऑरेंज कॅपची लढत आणखी रोमांचक झाली आहे. विराट कोहली या यादीत अव्वल स्थानी आहे. तर ऋतुराज गायकवाड आता दुसऱ्या स्थानी पोहोचला आहे. विराट कोहलीने आतापर्यंत १० सामन्यांमध्ये ५०० धावा केल्या आहेत. तर ऋतुराज गायकवाडने ९ सामन्यांमध्ये ४४७ धावा केल्या आहेत.

पर्पल कॅपच्या शर्यतीत कोण आघाडीवर?

चेन्नईच्या २ खेळाडूंनी पर्पल कॅपच्या यादीत प्रवेश केला आहे. मुंबई इंडियन्स संघाचा गोलंदाज जसप्रीत बुमराह या यादीत अव्वल स्थानी आहे. त्याने ९ सामन्यांमध्ये १४ गडी बाद केले आहेत. तर मुस्तफिजुर रहमानने ८ सामन्यांमध्ये १४ गडी बाद केले आहेत. तर हर्षल पटेलच्या नावे ९ सामन्यांमध्ये १४ गडी बाद करण्याची नोंद आहे. टॉप ३ मध्ये असलेल्या गोलंदाजांनी प्रत्येकी १४-१४ गडी बाद केले आहेत. त्यामुळे ही लढत आणखी रोमांचक होऊ शकते.