Team India : भारतीय क्रिकेट संघ इंग्लंडमध्ये होणाऱ्या पाच सामन्यांच्या कसोटी मालिकेसाठी तयारी करत आहे. या दरम्यान एक मोठी बातमी समोर आली आहे. भारतीय संघाचा प्रमुख प्रशिक्षक गौतम गंभीर भारतात परतत आहे. गंभीरच्या आईला हृदयविकाराचा झटका आल्याचे म्हटले जात आहे. त्यांना आयसीयूमध्ये दाखल केल्याने गंभीरने इंग्लंडवरुन मायदेशी परतण्याचा निर्णय घेतला आहे.

गौतम गंभीर ७ जून रोजी भारतीय संघासह लंडनला पोहोचला होता. सध्या भारताचा संघ बेकेनहॅममध्ये सराव करत आहे. आज (१३ जून) संघातील अंतर्गत सराव सामन्यांना सुरुवात होणार आहे. पण त्यापूर्वीच गौतम गंभीरला भारतात परतावे लागणार आहे. २० जूनपासून सुरु होणाऱ्या पहिल्या कसोटी सामन्यापूर्वी तो इंग्लंडमध्ये संघासोबत असेल असे म्हटले जात आहे.

गौतम गंभीरच्या आईचे नाव सीमा गंभीर आहे. त्यांना हृदयविकाराचा झटका आला होता. मिळालेल्या माहितीनुसार, हृदयविकाराचा झटका आल्यानंतर त्यांना रुग्णालयात दाखल करण्यात आले. सध्या आयसीयूमध्ये त्यांच्यावर उपचार सुरु आहेत. त्यांची प्रकृती स्थिरावली असून त्या धोक्याबाहेर असल्याची माहिती समोर आली आहे. आईसाठी गंभीर इंग्लंडचा दौरा सोडून मायदेशी परतणार आहे.

तेंडुलकर- अँडरसन ट्रॉफी

भारताचा संघ सध्या इंग्लंड विरुद्धच्या कसोटी मालिकेची तयारी करत आहे. २० जून रोजी भारत विरुद्ध इंग्लंड या कसोटी मालिकेतील पहिल्या सामन्याला सुरुवात होणार आहे. युवा कर्णधार शुभमन गिलच्या नेतृत्त्वात पहिल्यांदाच भारताचा संघ मैदानात उतरणार आहे. २० जून ते ४ ऑगस्ट या कालावधीत पाच कसोटी सामने खेळले जाणार आहेत.