Diogo Jota : क्रिडाविश्वातून दु:खद बातमी समोर आली आहे. लिव्हरपूलकडून खेळणारा पोर्तुगालचा फुटबॉलपटू डियोगो जोटाचे कार अपघातात निधन झाले आहे. अवघ्या १० दिवसांपूर्वी त्याचे लग्न झाले होते. या अपघातात डियोगो जोटाच्या भावाचा देखील मृत्यू झाल्याचे म्हटले जात आहे. पोर्तुगाल फुटबॉल फेडरेशनने सोशल मीडियावर अपघातासंबंधित माहिती देत डियोगो जोटाला श्रद्धांजली वाहिली आहे. स्पेनमधील झमोरा येथे डियोगो जोटाचे निधन झाले आहे.

'आज (३ जुलै) सकाळी स्पेनमध्ये डियोगो जोटा आणि त्याचा भाऊ आंद्रे सिल्वा यांचे कार अपघातात निधन झाले. पोर्तुगाल फुटबॉल फेडरेशन आणि पोर्तुगीज फुटबॉल संघाच्या चाहत्यांना या घटनेमुळे धक्का बसला आहे', असे ट्वीट पोर्तुर्गाल फुटबॉल फेडरेशनने केले आहे. २८ वर्षीय डियोगो जोटाने पोर्तुगालसाठी ४९ आंतरराष्ट्रीय सामने खेळला होता.

डियोगो जोटाचा जन्म ४ डिसेंबर १९९६ रोजी पोर्ता, पोर्तुगाल येथे झाला होता. २०१४ मध्ये त्याने पोर्तुगालच्या अंडर-१९ संघात स्थान मिळवले होते. पाच वर्षानंतर तो राष्ट्रीय संघात सामील झाला. त्याने एकूण ४९ आंतरराष्ट्रीय सामन्यांमध्ये सहभाग घेतला होता. यामध्ये त्याने एकूण १४ गोल केले आहोत. २०२० मध्ये डियोगो जोटाने लिव्हरपूलमध्ये प्रवेश केला होता. या क्लबकडून त्याने १२३ सामने खेळले. यात त्याने ४७ गोल केले. तो फॉरवर्ड, लेफ्ट विंगर पोझिशनमध्ये खेळायचा.

डियोगो जोटाने रुटे कार्डोसोशी २२ जून २०२५ रोजी लग्न केले होते. अनेक वर्षांपासून ते दोघे रिलेशनशिपमध्ये होते. बुधवारी त्याच्या पत्नीने, रुटे कार्डोसोने त्यांच्या लग्नाचा व्हिडीओ शेअर केला होता. या व्हिडीओमध्ये डियोगो जोटा, रुटे कार्डोसो आणि त्यांची ३ मुलं आहेत. डियोगो जोटाच्या निधनामुळे क्रिडा विश्वात हळहळ व्यक्त केली जात आहे.