आयपीएल २०२४ स्पर्धा झाल्यानंतर भारतीय संघ मिशन टी-२० वर्ल्डकप २०२४ स्पर्धेसाठी वेस्टइंडीजला रवाना होणार आहे. येत्या १ जूनपासून वेस्टइंडीज आणि अमेरिकेत या स्पर्धेचा थरार रंगणार आहे. या स्पर्धेपूर्वी भारतीय संघसाठी सकारात्मक बाब समोर आली आहे. संघातील स्टार फलंदाज सूर्यकुमार यादवच्या फिटनेसमध्ये सुधारणा झाली आहे. तसेच टी-२० वर्ल्डकपपर्यंत तो पूर्णपणे फिट होईल, असं म्हटलं जात आहे. सध्या तो मुंबई इंडियन्स संघाचं प्रतिनिधित्व करत असून, या संघासाठी शानदार कामगिरी करतोय.

पंजाबविरुद्ध तुफान फटकेबाजी..

पंजाब किंग्ज संघाविरुद्ध झालेल्या सामन्यात मुंबई इंडियन्स संघाने शानदार विजय मिळवला. या विजयात सूर्यकुमार यादवने मोलाचं योगदान दिलं आहे. या सामन्यात त्याने ५३ चेंडूंचा सामना करत ७८ धावांची खेळी केली. या खेळीदरम्यान त्याने ७ चौकार आणि ३ षटकार मारले. दिल्ली कॅपिटल्स संघाविरुद्ध झालेल्या सामन्यात त्याला शून्यावर माघारी परतावं लागलं होतं. मात्र त्यानंतर रॉयल चॅलेंजर्स बंगळुरु संघाविरुद्ध झालेल्या सामन्यात त्याने अवघ्या १७ चेंडूंचा सामना करत आपलं अर्धशतक पूर्ण केलं होतं.

आयपीएल २०२४ स्पर्धेत शानदार कामगिरी...

गेले काही महिने दुखापतग्रस्त राहिल्यानंतर अखेर सूर्यकुमार यादवने आयपीएल २०२४ स्पर्धेतून कमबॅक केलं आहे. त्याने रॉयल चॅलेंजर्स बंगळुरु संघाविरुद्ध झालेल्या सामन्यात १९ चेंडूंचा सामना करत ५२ धावांची खेळी केली. या खेळीदरम्यान त्याने ५ चौकार आणि ४ षटकार मारले. त्यानंतर चेन्नई सुपर किंग्ज संघाविरुद्ध झालेल्या सामन्यात त्याच्याकडून मोठ्या खेळीची अपेक्षा होती. मात्र तो शून्यावर बाद होऊन माघारी परतला. या हंगामातील ४ सामन्यांमध्ये तो २ वेळेस शून्यावर माघारी परतला आहे. तर २ सामन्यांमध्ये त्याने २ अर्धशतकी खेळी केली.