Asia Cup : आशिया कप २०२५ साठी पाकिस्तान क्रिकेट बोर्डाने पाकिस्तानचा संघ जाहीर केला आहे. पीसीबीने यूएईमध्ये होणाऱ्या तिरंगी मालिकेसाठी आणि आशिया कपसाठी १७ सदस्यीय संघ जाहीर केला आहे. या संघातून बाबर आझम आणि मोहम्मद रिझवान यांना वगळण्यात आले आहे. सलमान अली आगाकडे कर्णधारपदाची जबाबदारी देण्यात आली आहे.

माजी कर्णधार बाबर आझम आणि वनडे कर्णधार मोहम्मद रिझवान यांना यूएई तिरंगी मालिका आणि आशिया कप या दोन स्पर्धांसाठीच्या पाकिस्तानच्या संघातून वगळण्यात आले आहे. हे दोघे आशिया कपच्या निमित्ताने टी-२० संघात परतू शकतात असे म्हटले जात होते. पण पीसीबीने दोघांनाही धक्का दिला आहे. बाबर आझम आणि मोहम्मद रिझवान या दोघांनीही डिसेंबर २०२४ मध्ये पाकिस्तानकडून शेवटचा टी२० आंतरराष्ट्रीय सामना खेळला होता.

सलमान अली आघाकडे पाकिस्तानच्या टी२० संघाचे कर्णधारपद सोपवण्यात आले आहे. २०२५ च्या सुरुवातीपासून तो पाकिस्तान टी२० संघाचे नेतृत्त्व करत आहे. आशिया कपसाठी पीसीबीने तरुण खेळाडूंना संधी दिली आहे. सॅम अयुब, साहिबजादा फरहान, मोहम्मद हरिस आणि हसन नवाज यांचा संघात समावेश करण्यात आला आहे. शाहीन शाह आफ्रिदी आणि हरिस रौफ हे देखील पाकिस्तानच्या संघात सामील आहेत.

यूएई तिरंगा मालिका आणि आशिया कप २०२५ साठीचा पाकिस्तानचा संघ -

सलमान आगा (कर्णधार), अबरार अहमद, फहीम अशरफ, फखर जमान, हारिस रौफ, हसन अली, हसन नवाज, हुसैन तलत, खुशदिल शाह, मोहम्मद हारीस (यष्टीरक्षक), मोहम्मद नवाज, मोहम्मद वसीम, साहिबजादा फरहान, सईम अयूब, सलमान मिर्झा, शाहीन शाह आफ्रिदी आणि सुफियान मुकीम