आयपीएल २०२४ स्पर्धेतील प्लेऑफ सुरु होण्यापूर्वीच रॉयल चॅलेंजर्स बंगळुरु आणि चेन्नई सुपर किंग्ज या दोन्ही संघांमध्ये नॉकआऊटचा सामना पार पडला. चेन्नईला प्लेऑफमध्ये प्रवेश करण्यासाठी २०१ धावांची गरज होती. मात्र या धावांचा बचाव करताना रॉयल चॅलेंजर्स बंगळुरु संघाने २७ धावांनी बाजी मारली.

या विजयासह रॉयल चॅलेंजर्स बंगळुरुने प्लेऑफमध्ये प्रवेश केला. तर चेन्नईचा संघ स्पर्धेतून बाहेर पडला. या पराभवानंतर माजी खेळाडू अंबाती रायडू नाराज असल्याचे पाहायला मिळाले आहे. दरम्यान आता त्याने एक्स पोस्ट शेअर करत रॉयल चॅलेंजर्स बंगळुरु संघावर निशाणा साधला आहे.

चेन्नई सुपर किंग्ज आणि रॉयल चॅलेंजर्स बंगळुरु यांच्यातील सामना झाल्यानंतर रॉयल चॅलेंजर्स बंगळुरु संघातील खेळाडू मैदानावर जल्लोष साजरा करताना दिसून आले होते. त्यावेळी एमएस धोनी खेळाडूंसोबत हात मिळवण्यासाठी थांबला होता. मात्र रॉयल चॅलेंजर्स बंगळुरु संघातील खेळाडू जल्लोष साजरा करण्यात व्यस्त होते, हे पाहून एमएस धोनी निघून गेला. यावरुन धोनीवर टिका देखील केली गेली. या सामन्यानंतर अंबाती रायडू हात धुवून रॉयल चॅलेंजर्स बंगळुरु संघाच्या मागे लागला आहे.

आता त्याने आपल्या अधिकृत सोशल मीडिया अकाऊंटवरुन एक पोस्ट शेअर केली आहे. ज्यात त्याने नाव न घेताच विराटवर निशाणा साधला आहे. त्याने पोस्ट शेअर करत लिहीले की, " मला खूप वाईट वाटतं. रॉयल चॅलेंजर्स बंगळुरुचे फॅन्स कित्येक वर्षांपासून आपल्या संघाला सपोर्ट करत आहेत. जर आरसीबीच्या मॅनेजमेंट आणि लीडर्सने आपले वैयक्तिक रेकॉर्ड्स बाजूला ठेवले असते, तर या संघाने आतापर्यंत कितीतरी ट्रॉफी जिंकल्य असत्या. कितीतरी शानदार खेळाडूंना या फ्रँचायझीने जाऊ दिलं आहे. संघाच्या मॅनेंजमेंटवर दबाव टाकला गेला पाहिजे. मेगा ऑक्शनपासून नव्या पर्वाला सुरुवात करता येऊ शकते."