उत्तरप्रदेशमध्ये राजकीय घडामोडींना वेग आला असून बिहारमध्ये सम्राट चौधरी यांच्या मंत्रिमंडळ विस्तारानंतर भाजपनं आपलं लक्ष आता उत्तरप्रदेशमध्ये केंद्रीत केल्याचे पाहायला मिळत आहे. पुढच्या वर्षी होणाऱ्या विधानसभा निवडणुकीआधी राज्यात मंत्रिमंडळ विस्तार होणार असून आज मुख्यमंत्री योगी आदित्यनाथ हे राज्यपाल आनंदीबेन पटेल यांची भेट घेणार आहे. सूत्रांनी दिलेल्या महितीनुसार आज संध्याकाळी ते लोकभवन येथे जातील आणि कॅबिनेटमध्ये फेरबदल करण्याबाबत चर्चा करतील.

या चेहऱ्यांना मिळू शकते मंत्रिमंडळामध्ये संधी

आगामी निवडणुका डोळ्यासमोर ठेवून भाजप सामाजिक आणि जातीय संतुलन राखण्याची तयारी करत असल्याचे मानले जात आहे. सूत्रांनी दिलेल्या माहितीनुसार, मंत्रिमंडळात दोन ब्राम्हण नेत्यांचा समावेश केला जाऊ शकतो. तसेच दोन ओबीसी नेत्यांचीही मंत्रिपदीवर्णी लागू शकते. एक दलित आणि एका महिलेला देखील मांत्रिमंडळात शामील करू शकते. सर्व जाती धर्मातील नेत्यांना मंत्रिपद देऊन आगामी निवडणुकीच्याआधी योगी सरकार वोट बँक मजबूत करत आहे.

लखनऊमध्ये भाजपची राज्यस्तरीय बैठक

मंत्रिमंडळ विस्तारासह पक्ष संघटनेबाबत भाजप सज्ज झाली असून 11 आणि 12 मे रोजी लखनऊमध्ये एक मोठी बैठक घेण्याची शक्यता आहे. या सभेला राज्यातील सर्व 98 जिल्हयांचे अध्यक्ष उपस्थित राहणार आहेत. या बैठकीत आगामी निवडणुकीची रणनीती, संघटना मजबूत करणे आणि निवडणूक प्रचारावर चर्चा होणार आहे. तसेच भाजप महिलांमध्ये आपली पकड मजबूत करण्यावरही विशेष लक्ष देत आहे. अलीकडेच पक्षाने 'नारी शक्ति वंदन' अभियान सुरू केले आहे.