Mumbai Fire: मुंबईत अग्नितांडव! फटाक्याच्या दुकानाला भीषण आग, एकाचा होरपळून मृत्यू

दिवाळीच्या उत्सवादरम्यान मुंबईमध्ये फटाक्यांमुळे लागलेल्या आगीच्या अनेक घटना समोर आल्या आहेत. मुंबईत सोमवारी आगीच्या ३ घटना घडल्या. मालवणीमध्ये फटाक्याच्या दुकानाला भीषण आग लागली. या आगीमध्ये होरपळून एकाचा जागीच मृत्यू झाला. तर दुसरी घटना अंधेरीत घडली. अंधेरी पश्चिमेकडील लोखंडवालामध्ये इमारतीला आग लागली. सुदैवाने या घटनेत कोणतीही जिवीतहानी झाली नाही.

मुंबईतील मालवणी गेट क्रमांक ७ परिसरात फटाक्यांच्या दुकानाला भीषण आग लागली. या आगीमध्ये होरपळून एका व्यक्तीचा दुर्दैवी मृत्यू झाला. या आगीमध्ये मृत व्यक्तीचा मृतदेह जळून खाक झाला. आगीची माहिती मिळताच अग्निशमन दलाच्या सुमारे ५ गाड्या घटनास्थळी दाखल झाल्या होत्या. अग्निशमन दलाच्या जवानांनी अथक प्रयत्न करून आगीवर नियंत्रण मिळवले. मृतदेह शवविच्छेदनासाठी शताब्दी रुग्णालयात पाठवण्यात आला आहे. घटनेप्रकरणी पुढील कायदेशीर प्रक्रिया सुरू आहे. आगीचे नेमके कारण अद्याप स्पष्ट नाही.

दुसरी घटना, अंधेरी पश्चिमेकडील लोखंडवाला परिसरात इमारतीला भीषण आग लागली. अंधेरी पश्चिमेकडील लोखंडवाला येथील सुंदरवन परिसरात पूर्णा इमारतीला आग लागली. इमारतीमध्ये आग लागल्याने परिसरात एकच खळबळ उडाली. आगीचे कारण अद्याप स्पष्ट झालेले नाही. घटनेची माहिती मिळताच अग्निशमन दलाने घटनास्थळी धाव घेत आग विझवली. आगीत कोणतीही जीवितहानी झाली नाही. या आगीचे कारण समोर आले नाही.

तिसरी घटना, ओशिवरा परिसरात पुन्हा आगीची घटना घडली. मुंबईतील आगींचे सत्र थांबण्याचे नाव घेत नसल्याचे चित्र पाहायला मिळत आहे. ओशिवरा येथील महेश्वरी भवनच्या टेरेसवर आग लागली. इमारतीच्या छतावर उभारण्यात आलेल्या स्कॅफोल्डिंगला आग लागली. आगीमुळे परिसरात खळबळ उडाली होती आणि नागरिकांमध्ये भीतीचे वातावरण होते. आगीचे कारण अद्याप स्पष्ट झालेले नाही. अग्निशमन दलाकडून आग नियंत्रणात आणण्यासाठी प्रयत्न सुरू असल्याची माहिती आहे.