लग्नानंतर हनिमूनसाठी मेघालयमध्ये गेलेल्या इंदुरच्या राजा रघुवंशीची निर्घृण हत्या करण्यात आली होती. राजाची बायको सोनम आणि तिचा बॉयफ्रेंड राजनेच हे भयंकर कृत्य केले होते. या हत्या प्रकरणात सोनम आणि राजसह आणखी ५ जणांना पोलिसांनी अटक केली आहे. या हत्याकांड प्रकरणात रोज नवनवीन धक्कादायक खुलासे होत आहेत. पोलिस चौकशीदरम्यान सोनम आणि राजने नात्याची कबुली दिली, अशी माहिती मेघालय पोलिसांनी दिली.

राजा रघुवंशी हत्याकांड प्रकरणातील मास्टरमाइंड सोनम रघुवंशी आणि तिचा बॉयफ्रेंड राज कुशवाह यांनी आपल्या नात्याची कबुली दिली आणि राजाच्या हत्याकांडामधील आपली भूमिका स्वीकार केली. हिंदुस्तान टाईम्सने दिलेल्या वृत्तानुसार, पोलिस अधीक्षक विवेक सईम यांनी सांगितले की, सोनम आणि राज या दोघांनी आपला गुन्हा कबूल केला आहे आणि पोलिसांसाठी क्राईम सीन रिक्रिएट केला. 'हो आम्ही रिलेशनशिपमध्ये होतो.', असे त्यांनी पोलिस चौकशीदरम्यान सांगितले.

ईस्ट खासी हिल्स पोलिस अधीक्षक विवेक सिम यांनी मंगळवारी सांगितले की, 'राज आणि सोनम या दोघांनी रिलेशनशिपमध्ये असल्याचे मान्य केले. त्या दोघांची इच्छा होती की राजाला आयुष्यातून कायमचे काढून टाकायचे. राजा या दोघांच्या नात्यामध्ये येत होता. त्यामुळे त्यांनी राजाला संपवण्याचा कट रचला आणि त्याची हत्या केली.'

राजा कुशवाहवर सोनमचं प्रेम होते. तिला त्याच्यासोबतच राहायचे होते. पण सोनमच्या कुटुंबीयांनी तिचे लग्न इंदुरचा व्यावसायिक राजा रघुवंशीसोबत करून दिलं होतं. यामुळे नाराज झालेल्या सोनमने आपल्या कुटुंबीयांना धमकी दिली होती की, राजाशी लग्न झाल्यानंतर याचे गंभीर परिणाम भोगावे लागतील. सोनमने दिलेल्या धमकीकडे तिच्या कुटुंबीयांनी दुर्लक्ष केले. पण सोनम आणि राजचे प्रेमसंबंध राजाच्या हत्येचे मूळ कारण असल्याचे हळूहळू समोर येत आहे.