उत्तरप्रदेशमधील बांदा जिल्ह्यातून एक धक्कादायक घटना समोर आली आहे. कामासिन पोलीस ठाण्याच्या हद्दीत एक मुलाचे आणि मुलीचे मृतदेह एकत्र आढळल्याने परिसरात मोठी खळबळ उडाली आहे. मिळालेल्या माहितीनुसार, दोघांमध्ये गेल्या वर्षापासून प्रेमसंबंध होते आणि त्यांना एकमेकांशी लग्न करायचे होते. मात्र त्यांच्या कुटुंबीयांना हे मान्य नव्हते. दोघेही सतत एकमेकांच्या संपर्कात होते. ते दोघेही एकाच जातीचे असल्याचे ही सांगितले जात आहे. मुलीच्या नातेवाईकांच्या म्हणण्यांनुसार मुलाच्या कुटुंबाला हा संबंध मान्य नव्हता. लग्नात येणाऱ्या अडथळ्यांमुळे दोघे मानसिक तणावात होते. त्यामुळे दोघांनी एकत्र राहता येत नसेल तर एकत्र आपण जीवन संपवू असा धक्कादायक निर्णय दोघांनी घेतला. दोघांनी विषारी पदार्थांचे सेवन केले आणि जीवनयात्रा संपवली.

गावाबाहेर दोघेही बेशुद्ध अवस्थेत आढळल्याची माहिती मिळताच पोलिसांनी तातडीने घटनास्थळी धाव घेतली. त्यानंतर दोघांना उपचारासाठी रुग्णालयात दाखल करण्यात आले. मात्र डॉक्टरांनी तपासणीनंतर दोघांनाही मृत घोषित केले. या घटनेची माहिती मिळताच दोन्ही कुटुंबांमध्ये एकच टाहो फोडला. पोलिसांनी घटनास्थळी पाहणी करून आवश्यक कायदेशीर प्रक्रिया पूर्ण केली. पंचनामा करून दोन्ही मृतदेह शवविच्छेदनासाठी बांदा येथील राणी दुर्गावती वैद्यकीय महाविद्यालयात पाठवण्यात आले आहेत.

या प्रकरणाबाबत माहिती देताना उपअधीक्षक कृष्णकांत त्रिपाठी यांनी सांगितले की, कमासिन परिसरात एका प्रेमी युगलाने विषारी पदार्थ सेवन केल्याची माहिती मिळाली होती. पोलिस घटनास्थळी पोहोचले तेव्हा दोघेही बेशुद्ध अवस्थेत होते. त्यांना तात्काळ रुग्णालयात हलवण्यात आले, मात्र उपचारादरम्यान त्यांचा मृत्यू झाला.

एक वर्ष चाललेल्या या प्रेमकथेचा शेवट अत्यंत दुर्दैवी पद्धतीने झाला आहे. या घटनेनंतर दोन्ही कुटुंबांवर दुःखाचा डोंगर कोसळला असून, गावातही हळहळ व्यक्त केली जात आहे. पोलिस या संपूर्ण प्रकरणाचा सखोल तपास करत आहेत.