Washim Crime: अनैतिक संबंधात अडथळा, पत्नीने प्रियकराच्या मदतीने पतीला संपवलं, मृतदेह शेतात फेकला

• वाशिममध्ये पत्नीने पतीची हत्या केली

• बॉयफ्रेंडच्या मदतीने महिलेने पतीला संपवलं

• मृतदेह शेतात फेकून दिला

• वाशिम पोलिसांनी दोघांना केली अटक

मनोज जैस्वाल, वाशिम

वाशिममध्ये महिलेने पतीची हत्या केल्याची धक्कादायक घटना समोर आली. वाशिमच्या मालेगाव तालुक्यातील वाकळवाडी येथे ही घटना घडली. प्रेमात अडथळा ठरणाऱ्या पतीची पत्नीने प्रियकराच्या मदतीने गळा आवळून हत्या केली. या घटनेममुळे वाशिमध्ये एकच खळबळ उडाली आहे. या प्रकरणी पत्नी आणि तिच्या प्रियकराविरोधात गुन्हा दाखल करत पोलिसांनी त्यांना अटक केली.

पोलिसांनी दिलेल्या माहितीनुसार, अमानी येथील सुरेश झलके हे पत्नीसह वाकळवाडी इथे सासरी राहत होते. गुरूवारी सुरेशचा मृतदेह शेतात आढळून आला होता. घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेतला. शवविच्छेदनासाठी मृतदेह रुग्णालयात पाठवत पोलिसांनी पुढील तपास सुरू केला. तपासात अनैतिक संबंधातून ही घटना घडली असल्याचे समोर आले.

सुरेशचा पत्नीच्या प्रेमसंबंधांना विरोध होता. त्यातूनच पत्नी आशा झलके आणि तिचा प्रियकर महादेव अंभोरे यांनी सुरेशच्या हत्येचा कट रचला. योजनेनुसार आशा झलके यांनी सुरेशला बहाण्याने शेतात बोलावले. तेथे आधीपासूनच महादेव अंभोरे उपस्थित होता. दोघांनी मिळून सुरेशचा गळा आवळून हत्या केली. त्यानंतर संशय येऊ नये म्हणून मृतदेह शेतातील लिंबाच्या झाडाखाली टाकून दिला.

घटनेची माहिती मिळताच मेडशी पोलिस चौकी आणि मालेगाव पोलिस घटनास्थळी दाखल झाले. घटनास्थळावरील पुरावे आणि चौकशीच्या आधारे पोलिसांनी आशा झलके आणि महादेव अंभोरे यांना अटक केली. दोघांविरुद्ध हत्येचा गुन्हा दाखल करण्यात आला असून पुढील तपास मालेगाव पोलिस करत आहेत. या घटनेमुळे परिसरात खळबळ उडाली आहे.