Shocking Incident :आयटी फर्ममध्ये काम करणाऱ्या एका २५ वर्षीय सॉफ्टवेअर इंजिनिअरचा उंच इमारतीच्या ३१ व्या मजल्यावरुन खाली पडून मृत्यू झाला. हा इंजिनिअर त्याच्या दोन मित्रांसह भाडेतत्त्वावरील फ्लॅट पाहण्यासाठी आला होता. ही घटना गाझियाबादच्या इंदिरापूरममध्ये घडली आहे. या घटनेमुळे सोसायटीत मोठी खळबळ उडाली. त्यानंतर लगेच पोलिसांनी बोलावण्यात आले.

मृत्यू झालेल्या इंजिनिअरचे नाव सत्यम त्रिपाठी असे आहे. नोएडा सेक्टर २ मधील आयटी फर्ममध्ये काम करणारा सत्यम, त्याचा मित्र कार्तिक आणि प्रॉपर्टी एजंट सतपाल संध्याकाळी साडेसातच्या सुमारास साया गोल्ड अव्हेन्यू सोसायटीतील फ्लॅटची पाहणी करण्यासाठी गेले होते. सत्यमची बहीण आणि मेहुण्यासाठी ते भाड्याचे घर बघत होते. त्यावेळेस ही घटना घडली.

पोलिसांनी दिलेल्या माहितीनुसार, तिघे फ्लॅटची तपासणी करण्यासाठी १५ मिनिटे थांबले होते. निघण्याच्या तयारीत असताना सत्यमला फोन आला. तो खासगीत बोलण्यासाठी मास्टर बेडरूममध्ये गेले. कार्तिक आणि प्रॉपर्टी एजंट त्याची बाहेर येण्याची वाट पाहत होते. बराच वेळ झाला तरी सत्यम बेडरूममधून बाहेर न आल्याने दोघेजण आत शिरले. तेव्हा त्यांना बेडरूममध्ये कोणीही नसल्याचे आढळले.

दोघांनी बाल्कनीमधून खाली पाहिले. खाली लोक जमलेले होते. कार्तिक आणि प्रॉपर्टी एजंट धावत खाली गेले, त्यांना पार्किंग परिसरात सत्यमचा मृतदेह आढळला. ३१ व्या मजल्यावरून खाली पडल्याने त्याचा मृत्यू झाला होता. यानंतर स्थानिक पोलिसांना संपर्क करण्यात आला. आम्ही सर्व बाजूंनी प्रकरणाचा तपास करत आहोत, असे एसीपी अभिषेक श्रीवास्तव म्हणाले.

सुरुवातीला आत्महत्येचा संशय व्यक्त केला जात असताना, अपघात किंवा घातपात याचीही शक्यता तपासली जात आहे. फॉरेन्सिक टीमने फ्लॅटमधून पुरावे गोळा केले असून, त्रिपाठी यांचे कॉल रेकॉर्ड तपासले जात आहेत. मृतदेह शवविच्छेदनासाठी पाठवला असून अहवालाची प्रतीक्षा आहे. पोलिसांनी सत्यमचा मित्र आणि प्रॉपर्टी एजंटचे जबाब घेतले आहेत. इमारतीतील सीसीटीव्ही फुटेजही तपासले जात आहे. या प्रकरणी सत्यमच्या कुटुंबीयांनी अद्याप औपचारिक तक्रार दाखल केलेली नाही.