Crime : प्रेमानंद महाराजांना भेटण्याच्या बहाण्याने महिलेवर अत्याचार, आक्षेपार्ह व्हिडीओ बनवून धमकावले अन्...

Shocking : श्रद्धेच्या नावाखाली फसवणूक आणि शोषण केल्याचा धक्कादायक प्रकार उत्तरप्रदेशातील मथुरा येथे घडला आहे. वृंदावनातील राधा निवास येथे राहणाऱ्या एका व्यक्तीने आग्रा येथे राहणाऱ्या एका महिलेला आध्यात्मिक गुरु प्रेमानंद महाराजांशी वैयक्तिक भेट देण्याचे आमिष दाखवले आणि तिच्यावर बलात्कार केला. महिलेच्या तक्रारीनंतर आरोपीला अटक करण्यात आली.

पोलिसांनी दिलेल्या माहितीनुसार, याला १२ सप्टेंबर रोजी सुरुवात झाली. पीडिता वृंदावनचे प्रसिद्ध संत प्रेमानंद जी महाराज यांची अनुयायी आहे. सोशल मीडियावर तिची भेट आरोपीशी झाली. चॅटिंग केल्यानंतर त्यांच्यात मैत्री झाला. मी प्रेमानंद महाराजांचा भक्तांपैकी एक आहे आणि मला तुझी त्यांच्याशी भेट घडवून आणून देऊ शकतो असे आश्वासन आरोपीने पीडितेला दिले.

पीडिता तिच्या भावासह आग्राहून वृंदावनात आली. महाराजांचा आश्रम दूर आहे, तेथे वाहनांना परवानगी नाही असे आरोपीने महिलेच्या भावाला सांगितले आणि पार्किंगमध्ये कार घेऊन थांबायला लावले. आरोपी महिलेला दुचाकीवर घेऊन गेला. आश्रमाऐवजी तो पीडितेला राधाकृष्ण धाम नावाच्या हॉटेलमध्ये घेऊन गेला. तेथे त्याने कॉफी मागवली, कॉफीमध्ये गुंगीचे औषध टाकले.

कॉफी प्यायल्यानंतर महिला बेशुद्ध पडली. त्यानंतर आरोपीने तिच्यावर बलात्कार केला. तिचे आक्षेपार्ह व्हिडीओ बनवले आणि ते व्हिडीओ व्हायरल करण्याची धमकी देत तिला ब्लॅकमेल करण्यास सुरुवात केली. आरोपीने पीडितेवर अनेकदा अत्याचार केले. त्रासाला कंटाळून महिलेने पोलीस ठाण्यात तक्रार दाखल केली. त्यानंतर पोलिसांनी आरोपीला अटक केली. त्याला न्यायालयात हजर करण्यात आले, न्यायालयाने आरोपीला न्यायालयीन कोठडी सुनावली. आरोपीने रेकॉर्ड केलेले व्हिडीओ, चॅट रेकॉर्डिंग जप्त करण्याची प्रक्रिया सुरु आहे.