Accident : बसचालकाला हृदयविकाराचा झटका, चुकून अ‍ॅक्सिलरेटर दाबला अन् मोठा अनर्थ घडला; Video

Accident News : बंगळुरूच्या चिन्नास्वामी स्टेडियमजवळ मोठा अपघात घडला. बीएमटीसीच्या (बंगळुरू मेट्रोपॉलिटन ट्रान्सपोर्ट कॉर्पोरेशन) एका बसने नऊ वाहनांना धडक मारली. चालकाचा बसवरील नियंत्रण सुटले आणि हा अपघात घडल्याची प्राथमिक माहिती समोर आली आहे. या भीषण अपघाताचा व्हिडीओ सोशल मीडियावर व्हायरल होत आहे.

मिळालेल्या माहितीनुसार, बीएमटीसी बस चिन्नास्वामी स्टेडियमजवळ असताना चालकाचे बसवरचे नियंत्रण सुटले. बस चालकाला अचानक हृदयविकाराचा झटका आला. त्याने चुकून अ‍ॅक्सिलरेटर दाबल्याने अपघात झाला. त्यामुळे बस एकामागून एक पुढे असलेल्या वाहनांना धडक देत गेली. ही घटना सीसीटीव्ही कॅमेऱ्यामध्ये कैद झाली.

बस चालवत असताना चालकाला हृदयविकाराचा झटका आला. त्याने चुकून अ‍ॅक्सिलरेटर दाबला आणि बस सलग ९ वाहनांना धडक देत पुढे जात राहिली. यादरम्यान कंडक्टर पुढे धावला. त्याने बस नियंत्रित करण्याचा प्रयत्न केला. पण त्याला बस थांबवता आली नाही. चालकाला झटका आल्याचे आणि बसचा वेग वाढल्याचे सीसीटीव्ही फुटेजमध्ये स्पष्टपणे दिसून येत आहे.

भरधाव वेगाने येणाऱ्या बसने तब्बल नऊ वाहनांना जोरदार धडक मारली. यात एक ऑटोरिक्षा, कार, दुचाकीचा समावेश असल्याचे म्हटले जात आहे. धडकेमध्ये एका ऑटोरिक्षा चालकाला गंभीर दुखापत झाली, त्याला रुग्णालयात दाखल करण्यात आले आहे. यादरम्यान क्यूबन पार्क वाहतूक पोलिसांनी बस चालकाला ताब्यात घेतले आहे आणि चौकशी सुरू केली आहे.