गुजरातमधील मेहसाणा जिल्ह्यातून एक धक्कादायक बातमी समोर येत आहे. प्रियकराने विवाहित प्रेयसीवर लक्ष ठेवण्यासाठी एक शक्कल लढवली. त्यानं प्रेयसीच्या घरामागील झुडुपात सीसीटीव्ही कॅमेरा बसवला होता. याद्वारे तो तिच्यावर २४/७ लक्ष ठेवत होता. जेव्हा प्रेयसीच्या पतीला अलिकडेच झुडुपात कॅमेरा सापडला, तेव्हा त्यांनी पोलीस ठाण्यात तक्रार दाखल केली. पोलिसांनी तपासासाठी कॅमेरा आणि फुटेज तपासासाठी पाठवले आहेत.

मेहसाणा पोलिसांच्या एका वरिष्ठ अधिकाऱ्यांनी दिलेल्या माहितीनुसार, तक्रारदार ही काडी तालुक्यातील एका गावात अंगणवाडी सेविका आहे. महिलेचे आरोपीशी १० वर्षांपासून संबंध होते. काही महिन्यांनंतर तिचं लग्न झालं. लग्नानंतरही दोघं सातत्याने संवाद साधत होते. पण एके दिवशी तिच्या पतीने फोन आणि मेसेज पाहिले. तेव्हा त्यांचे गुपित उघड झाले.

यानंतर दोघांमध्ये वाद झाला. पतीनं पत्नीला तिच्या प्रियकरासोबत संबंध संपवण्यास भाग पाडले. पत्नीने पतीचे म्हणणे ऐकून प्रियकरासोबत संवाद साधणे बंद केले. दोघेही आरोपीला जाऊन भेटले. तसेच प्रियकराला महिलेच्या पतीने कोणतेही संबंध न ठेवण्यास सांगितले. परंतु, प्रियकराने नकार दिला. आरोपी वारंवार तिचा पाठलाग करायचा. अंगणवाडीपासून तिच्या घरापर्यंत सतत तिच्यावर लक्ष ठेवून होता.

अलिकडेच महिलेचा पती घराभोवती झुडपे साफ करत असताना एक छोटा सीसीटीव्ही कॅमेरा आढळला. जेव्हा पतीने डिव्हाइसचे मेमरी कार्ड तपासले, तेव्हा फुटेजमध्ये आरोपी कॅमेऱ्यासमोर दिसत होता. महिलेच्या पतीने पोलीस ठाण्यात जाऊन तक्रार दाखल केली. पोलिसांनी सांगितले की, आरोपीनं महिलेच्या हालचालींवर लक्ष ठेवण्यासाठी सीसीटीव्ही कॅमेरा बसवला असावा. आरोपीविरूद्ध गुन्हा दाखल करण्यात आला असून, पुढील तपास पोलिसांकडून सुरू आहे.