पाकिस्तानच्या कुर्रम या आदिवसी जिल्ह्यात सध्या तणावाचे वातावरण आहे. या जिल्ह्यामध्ये जमिनीच्या वादातून दोन गटामध्ये तुफान राडा झाला. दोन्ही गटांनी एकमेकांवर सशस्त्र हल्ला केला. या हिंसाचारामध्ये आतापर्यंत ४३ जणांचा मृत्यू झाला आहे. तर २०० पेक्षा अधिक जण जखमी झाले आहेत. कुर्रम जिल्ह्यातील हिंसाचार प्रभावित भागात पोलिस आणि सुरक्षा दलांचा मोठा फौजफाटा तैनात करण्यात आला आहे.

पाकिस्तानच्या वायव्यला असलेल्या कुर्रम या आदिवासी जिल्ह्यात जमिनीच्या वादामुळे हिंसाचार भडकला आहे. जमिनीच्या एका छोट्याशा तुकड्यासाठी दोन गट आमने-सामने आले आहेत. २४ जुलैपासून सुरू झालेला हा संघर्ष अजूनही सुरू आहे. या हिंसाचारामध्ये आतापर्यंत ४३ जणांचा मृत्यू झाला आहे. तर २०० हून अधिक जण जखमी झाले आहेत. जखमींवर वेगवेगळ्या रुग्णालयात उपचार सुरू आहेत.

स्थानिक आदिवासी जिरगाच्या मदतीने आणि समर्थनाने दोन गटाने सोमवारी तात्पुरता युद्धविराम जाहीर केला. अस्थिर पर्वतीय कुर्रम प्रदेशात गेल्या अनेक दशकांपासून दोन गटांमध्ये जातीय संघर्ष आणि दहशतवादी हल्ले झाले आहेत. सरकारच्या गृह आणि आदिवासी व्यवहार विभागाच्या म्हणण्यानुसार, कुर्रममध्ये सध्या आठ मोठे संघर्ष सुरू आहेत.

गेल्या आठवड्यात एका मालमत्तेच्या मालकीवरून दोन गटांमध्ये रक्तरंजित राडा झाला. या घटनेची माहिती जिल्हाभर पसरली. त्यामुळे हिंसाचार उसळला. संपूर्ण जिल्ह्यामध्ये ठिकठिकाणी हिंसाचाराच्या घटना झाल्या. यावेळी गोळीबाराच्या घटना देखील घडल्या. हा हिंसाचार र्ष आणि अशांतता टाळण्यासाठी परिसरातील बहुतांश गावांमध्ये रस्ते बंद करण्यात आले आहेत. मात्र, त्यामुळे नागरिकांना अन्न आणि औषधांचा तुटवडा जाणवत आहे. जिल्ह्यामध्ये पोलिसांचा कडक बंदोबस्त तैनात करण्यात आला आहे.