पाकिस्तानमध्ये क्रिकेट मॅच सुरू असताना भीषण स्फोट झाल्याची धक्कादायक घटना समोर आली आहे. पाकिस्तानच्या वायव्य खैबर पख्तूनख्वा प्रांतात शनिवारी ही घटना घडली. क्रिकेट मॅच सुरू असताना मोठा स्फोट झाला. या घटनेत एकाचा मृत्यू झाला. तर लहान मुलांसह अनेक जण जखमी झाले. या स्फोटामुळे संपूर्ण स्टेडिअम हादरले. स्फोटानंतर एकच गोंधळ उडाला आणि सर्वजण सैरावैरा पळू लागले.

मिळालेल्या माहितीनुसार, बाजौर जिल्ह्यातील खार तहसीलमधील कौसर क्रिकेट मैदानावर हा स्फोट झाला. डॉन बाजौर जिल्हा पोलिस अधिकारी वकास रफिक यांनी हा स्फोट आयईडीद्वारे घडवून आणला असल्याचे सांगितले. या स्फोटात एका व्यक्तीचा मृत्यू झाला. तर मुलांसह अनेक जण जखमी झाले. जखमींना जवळच्या रुग्णालयात उपचारासाठी दाखल करण्यात आले आहे. हा लक्ष्यित हल्ला असल्याचे सांगितले जात आहे.

स्फोट झाला तेव्हा स्टेडिअमवर आगीचे लोट पसरले होते. मैदानावर गोंधळ उडाला. प्रत्यक्षदर्शींनी सांगितले की, क्रिकेट सामना सुरू असताना स्फोटामुळे मैदानात गोंधळ निर्माण झाला. स्फोटामुळे मैदान हादरले आणि अनेक लोक घाबरून मैदानाबाहेर पळून गेले. या हल्ल्यामुळे परिसरातील क्रीडा स्पर्धांच्या सुरक्षेबाबत गंभीर चिंता निर्माण झाली आहे. अद्याप या हल्ल्याची जबाबदारी कुणी घेतली नाही.

गेल्या शनिवारीही अशाच प्रकारची घटना घडल्याची माहिती अधिकाऱ्यांनी दिली. दहशतवाद्यांनी लोवी मामुंड तहसीलमधील लघारी भागातील एका पोलिस ठाण्याला क्वाडकॉप्टरने लक्ष्य करण्याचा प्रयत्न केला. या गोळीबारात पोलिस कॉन्स्टेबल मोहम्मद हबीब आणि नागरिक नजीब खान जखमी झाले होते आणि परिसरात असलेल्या एका वाहनाचे नुकसान झाले होते.