NCERT ने महत्त्वाचा निर्णय घेतला आहे. आता दिल्ली एनसीईआरटीच्या नवीन पाठ्यपुस्तकांमधून मुघल आणि दिल्लीच्या सुलतानशाहीचे सर्व संदर्भ काढून टाकण्याचा निर्णय घेतला आहे. दरम्यान, भारतीय राजघराणे, भूगोल, महाकुंभ आणि मेक इन इंडिया, बेटी बचाओ, बेटी पढाओ या योजनांचा समावेश करण्यात आला आहे. यामुळे विद्यार्थ्यांना या नवीन गोष्टींची माहिती मिळणार आहे.

एनसीईआरटीची ही नवीन पुस्तके या आठवड्यात प्रसिद्ध करण्यात आली आहे. ही पाठपुस्तके नवीन राष्ट्रीय शिक्षण धोरण आणि नॅशनल करिक्युलम फ्रेमवर्क फॉर स्कूल एज्युकेशन २०२३ च्या अनुषंगाने तयार करण्यात आली आहे. या नवीन धोरणानुसार शालेय पाठ्यपुस्तकांमध्ये भारतीय परंपरा, तत्वज्ञान, स्थानिक संदर्भांचा समावेश आहे.

या नवीन पाठ्यपुस्तकांबाबत माहिती समोर आली आहे. हा पुस्तकाचा केवळ पहिला भाग आहे. दुसरा भाग काही महिन्यात सादर केला जाईल, असं एनसीईआरटीच्या अधिकाऱ्यांनी सांगितले आहे. मात्र, या पाठ्यपुस्तकाच्या दुसऱ्या भागात काढून टाकलेले भाग कायम ठेवणार काही नाही याबाबत कोणतीही माहिती समोर आली नाही. सध्या तरी पहिल्या भागात मुघल आणि दिल्लीतील राजवटीचे संदर्भ काढून टाकण्यात आले आहेत.

याआधीही एनसीईआरटीने मुघल आणि दिल्लीतील सुलतानशाहीचे काही संदर्भ काढून टाकले होते. यामध्ये तुघलक, खिलजी, लोधी या राजघराण्यांचा समावेश होता. त्यानंतर आता एनसीईआरटीच्या पहिल्या भागात हे सर्वच संदर्भ काढून टाकले आहेत. यामुळे विद्यार्थ्यांना आता मुघल व दिल्लीतील सुलताशाहीबाबद कोणतेही संदर्भ पाठ्यपुस्तकांमध्ये वाचता येणार नाही. दरम्यान, विद्यार्थ्यांना सध्याचा भारत, योजना, महाकुंभ याबाबत माहिती पाठ्यपुस्तकांमध्ये मिळणार आहे.