बिहारमधील मोकामा येथील जेडी(यू) आमदार अनंत सिंह एका मोठ्या रस्ते अपघातातून थोडक्यात बचावले. बारह उपविभागांतर्गत येणाऱ्या अथमलगोला पोलीस ठाण्याच्या हद्दीतील सबनिमा पेट्रोल पंपाजवळ त्यांच्या ताफ्यातील अनेक वाहनांचा अपघात झाला. ताफ्यातील पाच वाहने एकमेकांवर आदळली. अपघात इतका भीषण होता की, घटनास्थळी गोंधळ उडाला. मात्र या अपघातात कोणालाही गंभीर दुखापत झाली नाही.

मिळालेल्या माहितीनुसार, मोकामा विधानसभा मतदारसंघातील बडपूर गावात एका विवाह समारंभासाठी अनंत सिंह गेले होते. आमदार अनंत सिंह यांच्या ताफ्यात सुमारे १५ वाहने होते. आमदार ताफ्यासह पाटण्याला परतत होते, त्यावेळी आमदारांची गाडी सर्वात पुढे होती. रस्त्याच्या कडेला अनेक ट्रक लाइनमध्ये उभे होते. आमदारांची गाडी सुरळीतपणे तेथून निघून गेली. परंतु त्यांच्या कार मागे चालणाऱ्या कार चालकाचा गाडीवर ताबा सुटला आणि कार उभ्या असलेल्या ट्रकला धडकली.

पाच वाहनांची जोरदार धडक

दुसरे वाहन ट्रकला धडकले आणि त्याच्या मागे असलेली इतर चार वाहनेही एकमेकांवर आदळली. अपघातानंतर रस्त्यावर गोंधळाचे वातावरण निर्माण झाले आणि लोकांची गर्दी जमली. प्रत्यक्षदर्शींच्या म्हणण्यानुसार, घटनेची माहिती मिळताच आमदार अनंत सिंह यांनी आपली गाडी त्वरित थांबवली आणि ते घटनास्थळी पोहोचले. त्यांनी ताफ्यातील लोकांच्या प्रकृतीची विचारपूस केली आणि कोणालाही गंभीर दुखापत झाली नाही ना, याची खात्री केली. परिस्थितीचा आढावा घेण्यासाठी घटनास्थळी सुमारे पाच मिनिटे थांबल्यानंतर, ते आपल्या प्रवासाला पुढे निघाले. या अपघातात वाहनांचे नुकसान झाले आहे, परंतु जीवितहानी झाल्याचे कोणतेही वृत्त नाहीये.