• मध्य प्रदेशमध्ये महामार्गावर अपघाताचा थरार

• भरधाव ट्रकची कारला धडक

• अपघातामध्ये सहा भाविकांचा मृत्यू

• महाकाल दर्शनाहून परतताना घडली घटना

मध्य प्रदेशमध्ये महामार्गावर भीषण अपघाताची घटना घडली. महाकालच्या दर्शनासाठी गेलेल्या भाविकांवर काळाने घाला घातला. भरधाव ट्रकने कारला धडक दिली. या अपघातामध्ये ६ तरुणांचा जागीच मृत्यू झाला. धार जिल्ह्यातील बदनावर-उज्जैन महामार्गावर रविवारी दुपारी ही घटना घडली. अपघातामध्ये जखमी झालेले सर्व तरुण गुजरातचे होते.

मिळालेल्या माहितीनुसार, पंचकवासा गावाजवळ दुपारी १ वाजताच्या सुमारास भीषण अपघात झाला. चुकीच्या दिशेने येणाऱ्या भरधाव ट्रकने भाविकांच्या कारला धडक दिली. अपघातामध्ये कारचा चुराडा झाला. कारमधील ६ तरुणांचा जागीच मृत्यू झाला. या अपघातामध्ये एक तरुण गंभीर जखमी झाला आहे. या तरुणाला उपचारासाठी बदनावर सिव्हिल हॉस्पिटलमध्ये दाखल करण्यात आले आहे.

अपघातामध्ये मृत्यू आणि जखमी झालेले सर्व तरुण हे गुजरातच्या बडोदरा येथे राहणारे होते. हे सर्वजण मित्र होते आणि दर्शनासाठी महाकालला आले होते. उज्जैन येथे भगवान महाकालच्या दर्शनासाठी ते आले होते. दर्शन घेतल्यानंतर ते गुजरातला घरी परत जात होते. त्याचवेळी चुकीच्या दिशेने येणाऱ्या ट्रकने त्याच्या कारला जोरदार धडक दिली. ट्रकमध्ये लोखंड होते. दोन्ही वाहनांची समोरासमोर धडक झाली. ही धडक इतकी भयंकर होती की कारचा चुराडा झाला. अपघातानंतर ट्रक चालक फरार झाला. पोलिस त्याचा शोध घेत आहे.

अपघातानंतर पोलिसांनी घटनास्थळी धाव घेतली. स्थानिकांच्या मदतीने कारमध्ये अडकलेल्यांचे मृतदेह आणि जखमीला बाहेर काढण्यात आले. कारचा चुराडा झाल्यामुळे मृतदेहाचे तुकडे झाले होते त्यांना बाहेर काढणं देखील कठीण आहे. सहाही जणांचे मृतदेह शवविच्छेदनासाठी रुग्णालयात पाठवण्यात आले आहेत. तर एका जखमीवर उपचार सुरू असून त्याची प्रकृती चिंताजनक आहे.