Accident : स्कूल बसमधून पडून ७ वर्षांच्या ईश्वरी ठाकरेचा मृत्यू; धक्कादायक घटनेनं खळबळ

अमर गटारे, अमरावती प्रतिनिधी

Amravati school bus accident : स्कूल बसमधून खाली उतरताना अपघात झाल्याने ७ वर्षांच्या मुलीचा घटनास्थळीच दुर्दैवी मृत्यू झाला. अमरावती जिल्ह्यातील मोर्शी तालुक्यातील रिद्धपूर येथे ही हृदयद्रावक घटना घडली आहे. ईश्वरी ठाकरे असे या मृत चिमुकलीचे नाव आहे. या घटनेमुळे संपूर्ण परिसरात हळहळ व्यक्त केली जात असून नागरिकांमधून तीव्र संताप व्यक्त होत आहे.

मिळालेल्या प्राथमिक माहितीनुसार, ईश्वरी स्कूल बसमधून खाली उतरत होती. त्याच वेळी चालकाने घाईगडबडीत बस पुढे नेली. यामुळे ईश्वरीचा तोल बिघडून ती खाली पडली आणि बसचे चाक तिच्या अंगावरून गेले. या भीषण अपघातात गंभीर दुखापत झाल्यामुळे तिचा जागीच मृत्यू झाला. घटना घडल्यानंतर परिसरातील नागरिकांनी मोठी गर्दी केली होती.

अपघाताची माहिती मिळताच पोलिसांनी घटनास्थळावर धाव घेतली. पोलिसांनी तात्काळ नागरिकांना शांत करण्याचा प्रयत्न केला. पोलिसांनी दुर्घटनेस्थळावर पंचनामा केल्यानंतर मुलीचा मृतदेह चांदूर बाजार येथील ग्रामीण रुग्णालयात पोस्टमार्टमसाठी पाठवला. पोलिसांनी या प्रकरणी गुन्हा दाखल करून तपास सुरू केला आहे.

या घटनेची गंभीर दखल घेण्यात आली असून, अमरावती पोलीस अधीक्षकांच्या मार्गदर्शनाखाली शिरखेड पोलीस स्टेशन आणि चांदूर बाजार पोलीस स्टेशनचे अधिकारी या प्रकरणी पुढील तपास करत आहेत. चालकाच्या निष्काळजीपणामुळे हा अपघात झाल्याचा आरोप करत स्थानिक नागरिकांनी प्रशासनाने कठोर कारवाई करण्याची मागणी केली आहे. पोलिसांनी चालकावर गुन्हा दाखल करून तपासाला सुरूवात केली आहे.