लोकसभा निवडणूक २०२४ चा (Loksabha Election 2024) निकाल ४ जूनला म्हणजे उद्या जाहीर होणार आहे. या निकालाकडे सर्वांचे लक्ष लागले आहे. लोकसभा निवडणूक निकालापूर्वी निवडणूक आयोगाने (Election Commission Of India) पत्रकार परिषद घेत महत्वाची माहिती दिली. देशाचे मुख्य निवडणूक आयुक्त राजीव कुमार (Rajiv Kumar) यांनी देशामध्ये यावेळी किती ठिकाणी फेरमतदान झालं याबाबत सांगितले. २०२४ मध्ये फक्त ३९ ठिकाणी फेरमतदान झालं असल्याची माहिती त्यांनी दिली.

मुख्य निवडणूक आयुक्त राजीव कुमार यांनी सांगितले की, निवडणूक कर्मचाऱ्यांच्या सावधानपूर्वक कामामुळे आम्ही कमी फेरमतदान सुनिश्चित केले आहे. आम्ही २०२४ च्या लोकसभा निवडणुकीमध्ये ३९ फेरमतदान झाले. २०१९ मध्ये ५४० फेरमतदान झाले होते. या ३९ पैकी २५ फेरमतदान फक्त २ राज्यांमधील आहेत. अरुणाचल आणि मणिपूरमध्ये ही दोन राज्य आहेत. यासोबत मध्यप्रदेश आणि पश्चिम बंगाल या राज्यांमध्ये देखील फेरमतदान झालं पण प्रमाण कमी होते.'

राजीव कुमार यांनी पुढे सांगितले की, 'ही निवडणूक त्या सार्वत्रिक निवडणुकांपैकी एक आहे ज्यामध्ये आम्ही हिंसाचार पाहिला नाही. यासाठी दोन वर्षांची तयारी करावी लागली. आता मतमोजणीसाठी आम्ही पूर्ण तयारी केली आहे.' यावेळी त्यांनी असे देखील सांगितले की, 'यावर्षी ६४ कोटी नागरिकांनी मतदान केले. यावर्षी ३१.४ कोटी महिला मतदारांनी मतदानाचा हक्का बजावला.'

तसंच, राजीव कुमार यांनी असे देखिल सांगितले की, 'निवडणूक आयोगाने या निवडणुकीत सुमारे १०,००० कोटी रुपये जप्त करण्याचा विक्रम केला आहे. हे २०१९ मध्ये जप्त केलेल्या मूल्याच्या जवळपास ३ पट आहे. स्थानिक टीमला त्यांचे काम करण्याचे अधिकार देण्यात आले होते. जम्मू आणि काश्मीरमध्ये एकूण ५८.५८ टक्के मतदान झाले.'