काँग्रेस नेते व्हि.डी. सतीशन यांनी सोमवारी केरळम राज्याचे 13 वे मुख्यमंत्री म्हणून शपथ घेतली. राज्यपाल राजेंद्र आर्लेकर यांनी सतीशन यांच्यासह संपूर्ण 20 सदस्यांना मंत्रिमंडळाची शपथ दिली. शपथविधीनंतर झालेल्या पहिल्याच मंत्रिमंडळ बैठकीत केरळम सरकारने अनेक महत्वाचे निर्णय घेतले. यातील सर्वात महत्वाचा निर्णय म्हणजे 15 जूनपासून महिलांना केएसआरटी बसमधून मोफत प्रवासाची सुविधा देण्यात येणार आहे. यासह इतरही निर्णय घेण्यात आले आहे.

यामध्ये आशा सेविकांच्या मानधनात तीन हजार रुपयांची वाढ करण्यात आली असून ज्येष्ठ स्वतंत्र विभाग स्थापन करण्याची घोषणाही करण्यात आली. तसेच 2023 मधील 'नव केरळ' यात्रा दरम्यान युवक काँग्रेस कार्यकर्त्यांवर झालेल्या हल्ल्यांच्या चौकशीसाठी विशेष एसआयटी स्थापन करण्याचा निर्णय घेण्यात आला. राज्याच्या आर्थिक स्थितीवर श्वेतपत्रिका प्रसिद्ध करण्याचाही निर्णय मंत्रिमंडळाने घेतला.

महाराष्ट्र काँग्रेसचे प्रभारी चेन्नीथला गृहमंत्री

काँग्रेसने थिरुवंचूर राधाकृष्णन यांची विधानसभा अध्यक्षपदी नियुक्ती केली असून शनिमोल उस्मान या उपाध्यक्ष असतील. 22 मे रोजी विधानसभा अध्यक्षांची औपचारिक निवड होणार असून 29 मे रोजी राज्यपालांचे अभिभाषण होणार आहे. मुख्यमंत्रिपदाचे शर्यतीत असलेले रमेश चेन्नीथला यांच्याकडे गृहखाते दिले आहे.

या शपथविधी सोहळ्यास काँग्रेसचे नेते राहुल गांधी, प्रियाका गांधी, माजी मुख्यमंत्री पिनारायी विजयन, भाजप नेते राजीव चंद्रशेखर तसेच काँग्रेससशासित राज्याचे मुख्यमंत्री उपस्थित होते. शपथविधीपूर्वी सतीशन यांनी राहुल गांधी आणि काँग्रेस अध्यक्ष मल्लिकार्जुन खरगे यांनी हात उंचावून अभिवादन केले. सतीशन हे सलग सहाव्यादा पारावूर मतदारसंघातून आमदार म्हणून निवडून आले आहेत. दरम्यान मंत्रिमंडळात काँग्रेसचे 11 मंत्री आहेत.