केरळमध्ये भयंकर घटना समोर आली आहे. याठिकाणी विशेष पोक्सो न्यायालयाने एका महिलेला आणि तिच्या बॉयफ्रेंडला १८० वर्षांच्या तुरूंगवासाची शिक्षा सुनावली आहे. या तरुणाने महिलेच्या १२ वर्षांच्या मुलीवर वारंवार बलात्कार केला. यासाठी महिलेने तिच्या बॉयफ्रेंडला मदत केल्याचा आरोप आहे. महिलेने तिच्या अल्पवयीन मुलीला तिच्या बॉयफ्रेंडसोबत लैंगिक संबंध ठेवण्यास भाग पाडले आणि तिला दारू देखील पाजली, अशी माहिती सरकारी वकिलाने न्यायालयात दिली.

टाईम्स ऑफ इंडियाने दिलेल्या वृत्तानुसार, न्यायालयाने महिला आणि तिच्या बॉयफ्रेंडला १८० वर्षांची शिक्षा सुनावली आणि १.१७ लाख रुपयांचा दंड ठोठावला. सुनावणीदरम्यान न्यायाधीश अशरफ एएम यांनी असे सांगितले की, दोघेही पोक्सो कायदा, भारतीय दंड संहिता आणि बाल न्याय कायद्याच्या विविध तरतुदींनुसार दोषी आहेत. आरोपी तरुण पलक्कडचा रहिवासी आहे. तर आरोपी महिला तिरुवनंतपुरमची रहिवासी आहे.

विशेष सरकारी वकील सोमसुंदरन ए यांनी सांगितले की, ही ३० वर्षी महिला तिच्या पती आणि मुलीसह तिरुवनंतपुरममध्ये राहत होती. यादरम्यन ती ३३ वर्षीय आरोपीच्या संपर्कात आली. त्यानंतर ती त्याच्यासोबत पळून गेली आणि दोघेही पलक्कड आणि मलप्पुरममध्ये एकत्र राहत होते. बॉयफ्रेंडसोबत राहत असताना या महिलेने आपल्या मुलीला देखील घेऊन गेली होती.

सरकारी वकिलांनी सांगितले की, महिलेच्या जोडीदाराने डिसेंबर २०१९ ते नोव्हेंबर २०२० दरम्यान मुलीवर अनेक वेळा बलात्कार केला. हे डिसेंबर २०२० ते ऑक्टोबर २०२१ पर्यंत चालू राहिले. मुलीवर लैंगिक अत्याचार करण्यासाठी बॉयफ्रेंडला मदत करणाऱ्या आईला दोषी ठरवण्यात आले आहे. आरोपी आई गुन्ह्याची साक्षीदार होती आणि तिने अल्पवयीन मुलीला लैंगिक संबंध ठेवण्यास भाग पाडत होती आणि ती ते पाहत होती.

महिलेवर मुलीला अश्लील व्हिडिओ दाखवल्याचा आणि तिला बिअर पाजल्याचा देखील आरोप होता. महिलेने मुलीला धमकी दिली की तिच्या डोक्यात सीसीटीव्ही कॅमेरा बसवण्यात आला आहे आणि जर तिने हे कोणाला सांगितले तर ते आम्हाला कळेल. या घटनेमुळे केरळमध्ये खळबळ उडाली आहे. आरोपी महिला आणि तिच्या बॉयफ्रेंडला पोलिसांनी अटक केली असून या दोघांना आता तुरूंगवासाची शिक्षा सुनावण्यात आली आहे.