Crime: अडीच वर्षांच्या चिमुकलीवर लैंगिक अत्याचार, ८० वर्षांच्या वृद्धाचं संतापजनक कृत्य; धुळे हादरले

Summary:

• धुळ्यामध्ये अडीच वर्षांच्या मुलीवर लैंगिक अत्याचार

• ८० वर्षांच्या वृद्धाचं भयंकर कृत्य

• स्थानिकांच्या सतर्कतेमुळे घटना उघडकीस

• पोलिसांनी आरोपीला केली अटक

भूषण अहिरे, धुळे

धुळ्यातून एक अत्यंत संतापजनक आणि माणुसकीला काळिमा फासणारी घटना समोर आली आहे. धुळ्यामध्ये अडीच वर्षांच्या मुलीवर लैंगिक अत्याचार करण्यात आले. धुळे शहरातील विश्वकर्मा नगर परिसरात ही घटना घडली. ८० वर्षीय वृद्धाने हे भयंकर कृत्य केले. या घटनेमुळे परिसरात तीव्र संतापाची लाट उसळली आहे. या प्रकरणी पोलिसांनी आरोपीला अटक केली असून पुढील तपास करत आहेत.

मिळालेल्या माहितीनुसार, धुळे शहरातील विश्वकर्मा नगरमध्ये सोमवारी ही घटना घडली. एका ८० वर्षीय वृद्धाने अडीच वर्षांच्या चिमुकलीवर लैंगिक अत्याचार करण्यात आले. या घटनेमुळे धुळ्यात खळबळ उडाली. हा प्रकार परिसरातील नागरिकांच्या लक्षात येताच त्यांनी तातडीने चिमुकलीची सुटका केली आणि संशयित वृद्धाला पकडले. त्यानंतर त्यांनी या घटनेची माहिती चाळीसगाव रोड पोलिसांना दिली.

या घटनेची माहिती मिळताच पोलिस पथक घटनास्थळी दाखल झाले आणि त्यांनी वृद्धाला ताब्यात घेतले. पीडितेच्या कुटुंबीयांनी दिलेल्या तक्रारीवरून, संशयित आरोपीविरोधात भारतीय न्याय संहिता आणि पोक्सो कायद्याअंतर्गत गुन्हा दाखल करण्यात आला आहे. त्यानंतर पोलिसांनी आरोपीला अटक केली. या प्रकरणाचे गांभीर्य ओळखून पोलिस तपासाला वेग आला आहे. लवकरच न्यायालयात दोषारोपपत्र दाखल केले जाईल, अशी माहिती पोलिस निरीक्षक सुरेश कुमार घुसर यांनी दिली आहे.