Pune Crime: पुणे हादरले! दिवसाढवळ्या रक्तरंजित थरार, तिघांनी धारदार शस्त्राने वार करत तरुणाला संपवलं

Summary -

• पुण्यात दिवसाढवळ्या तरुणाची निर्घृण हत्या

• बाजीराव रोडवर भररस्त्यावर तरुणाला संपवलं

• तिघांनी धारदार शस्त्राने वार करत तरुणाची हत्या केली

• पोलिसांनी घटनास्थळी धाव घेत तपास केला सुरू

अक्षय बडवे, पुणे

पुण्यामध्ये दिवसाढवळ्या हत्येची भयंकर घटना समोर आली आहे. पुण्यातील मध्यवर्ती भाग असलेल्या बाजीराव रोडवर तरुणाची निर्घृण हत्या करण्यात आली. भररस्त्यात पालघनने सपासप वार करत तरुणाला जागीच संपवण्यात आले. मयंक खराडे असं हत्या झालेल्या तरुणाचे नाव आहे. या घटनेमुळे परिसरात खळबळ उडाली असून नागरिकांमध्ये भीतीचे वातावरण आहे. पोलिस सध्या या प्रकरणाचा तपास करत आहेत.

मिळालेल्या माहितीनुसार, पुण्यातील कोंढव्यामध्ये हत्येचे प्रकरण ताजं असतानाच पुणे शहरातील मुख्य रस्त्यावर तरुणाची हत्या करण्यात आली. पुण्यातील बाजीराव रोडवर हत्येची ही थरारक घटना घडली. मयंक खराडे तरुण पुण्यातील आंबीजोरा परिसरात राहत होता. मयंक खराडे आपल्या मित्रासोबत बाजीराव रोडवरून जात होता. त्यावेळी ही भयंकर घटना घडली.

मयंकचा पाठलाग करत त्याठिकाणी दुचाकीवरून तिघेजण आले. त्यांनी मयांकवर पालघनने सपासप वार केले. मयंकच्या डोक्यावर, मानेवर वार करण्यात आले. या हल्ल्यात गंभीर जखमी झालेल्या मयाकने जागीच प्राण सोडले. मयांक रस्त्याच्या मधोमध रक्ताच्या थारोळ्यात पडला होता. मयांकची हत्या का करण्यात आली? यामागचे कारण अद्याप समोर आले नाही. या घटनेची माहिती मिळताच पुणे पोलिसांच्या पथकाने घटनास्थळी धाव घेतली. पोलिस सध्या या प्रकरणाचा तपास करत आहेत.

पोलिसांनी सांगितले की, आज दुपारी ३.१५ वाजण्याच्या सुमारास ही घटना घडली. अभिजीत इंगळे आणि त्याचा मित्र मयंक खराडे हे दुचाकीवर जात असताना महाराणा प्रताप उद्यानाच्या जवळ दखनी मिसळच्या समोर अचानक जनता वसाहतमधील तीन तरुण त्यांचा पाठलाग करत आहे. या तरुणांनी तोंडाला मास्क लावले होते. आरोपींनी मयंकच्या डोक्यावर आणि तोंडावर धारदार शस्त्राने वार केले. त्याचा जागीच मृत्यू झाला.