Crime News : पुण्यात तोडफोडीचे सत्र कायम! सोसायटीमधील CCTV आणि वाहने फोडली, नागरिकांमध्ये भीतीचं वातावरण

अक्षय बडवे, पुणे प्रतिनिधी

पुण्यातून धक्कदायक बातमी समोर आली आहे. जिल्ह्यातील काही दहशत माजवणाऱ्या तरुणांनी हातात हत्यार घेऊन पार्किंगमधील गाड्या फोडल्या असल्याचं समोर आलं आहे. इतक्यावरच न थांबता या तरुणांनी सीसीटीव्ही कॅमेरे देखील फोडले आहेत. या घटनेनंतर परिसरात भीतीचे वातावरण निर्माण झाले असून शहरातील नागरिकांनी संताप व्यक्त केला आहे.

मिळालेल्या माहितीनुसार, काल म्हणजे ३ नोव्हेंबर रोजी मध्यरात्री १ वाजता पुण्यातील धायरी परिसरात असणाऱ्या एका सोसायटी मध्ये काही तरुणांनी दहशत माजवली. एका सोसायटी मध्ये रात्री १ वाजण्याच्या दरम्यान ३ ते ४ तरुणांनी हातात शस्त्र घेऊन प्रवेश केला. सुरवातीला, पार्किंग मध्ये असलेल्या सी सी टिव्ही फोडण्याच्या यातील एकाने प्रवेश केला. या नंतर ही टोळी थेट सोसायटी चे जिने चढून वरील काही मजल्यांवर गेली.

त्यानंतर खाली आल्यावर पुन्हा एकदा या टोळक्याने पाहणी केली आणि पार्किंग मध्ये उभ्या असलेल्या अनेक वाहनांवर हातातील धारदार शस्त्राने त्याची तोडफोड केली. कारवाईच्या भीतीने आणि दहशत निर्माण व्हावी म्हणून यातील एकाने तर थेट सी सी टिव्ही वर हातातील धारदार शास्त्राने मारले आणि त्याचे सुद्धा नुकसान केले.

या घटनेने सोसायटीतील आणि तेथील परिसरात भीतीपूर्ण वातावरण निर्माण झाले आहे. पुण्यातील हे तोडफोडीचं सत्र नवीन नसून गेल्या महिन्याभरात अशाप्रकारच्या अनेक घटना घडल्या आहेत. पोलिसांनी याप्रकरणी दखल घेऊन अशा दहशत माजवणाऱ्या तरुणांना त्वरित अटक करावी यासाठी नागरिकांची मागणी जोर धरू लागली आहे.