केंद्रीय आदिवासी मंत्री आणि भाजपचे ज्येष्ठ नेते जुएल ओराम यांनी आपल्याच पक्षातील सहकाऱ्यांवर गंभीर आरोप केले आहे. भाजपमधील काही नेते आपल्याला केंद्रीय मंत्रिमंडळातून हटवण्यासाठी आणि आपली राजकीय प्रतिमा मलिन करण्यासाठी कट रचत असल्याचा आरोप जुएल ओराम यांनी केला आहे. त्यांच्या या आरोपांममुळे ओडिशाच्या राजकारणात मोठी खळबळ उडाली आहे.

या प्रकरणावर जुएल ओराम यांनी याआधी प्रतिक्रिया देताना कायद्याने आपले काम करावे आणि कायदेशीर कारवाईला आपली कोणतीही हरकत नसल्याचे म्हटले होते. मात्र त्यानंतर लगेचच त्यांनी आपल्याच पक्षातील नेत्यांवर जोरदार हल्लाबोल चढवला. सुंदरगड लोकसभा मतदारसंघातून तब्बल सहा वेळा खासदार राहिलेल्या जुएल ओराम यांनी भाजपमधील काही नेते आपल्याला बदनाम करण्यासाठी पाण्यासारखा पैसा खर्च करत असल्याचा आरोप केला. आपल्याला केंद्रीय मंत्रिमंडळातून हटवले गेले, तर आपल्याला मंत्रीपद मिळेल, असा काही नेत्यांचा समज असल्याचे त्यांनी म्हटले.

या राजकीय कटानंतर आपण आपला निर्णय बदलल्याचेही ओराम यांनी स्पष्ट केले. याआधी आपण पुढील लोकसभा निवडणूक न लढवण्याचा निर्णय घेतला होता. मात्र सध्याची परिस्थिती पाहता आपण 2029 ची लोकसभा निवडणूक नक्की लढवणार असीन आपल्या विरोधकांचा सामना करणार असल्याचे त्यांनी सांगितले.

आपल्याविरोधात सुरू असलेल्या या षडयंत्रामागे नेमके कोणते लोक आहेत, याचा आपण शोध घेणार असल्याचे ओराम यांनी म्हटले. या संदर्भात आपण ओडिशा भाजप संघटन महामंत्र्यांकडेही तक्रार केल्याचे त्यांनी सांगितले. दरम्यान, याच संवादादरम्यान ओराम यांच्या एका वादग्रस्त वक्तव्यामुळे नव्या वादाला तोंड फुटले. आपल्याला बदनाम करण्याचा प्रयत्न करणाऱ्यांविरोधात कठोर पावले उचलण्याची आणि 'त्यांचे हात कापण्याची' क्षमता आपल्यात असल्याचे वक्तव्य ओराम यांनी केले.