हाँगकाँगमध्ये एका गगनचुंबी निवासी इमारतीला भीषण आग लागली. या आगीत रहिवाशांचा होरपळून मृत्यू झाला. आगीचे कारण अस्पष्ट असून, सध्या बचावकार्य सुरू आहे. द गार्डियनच्या अहवालात तज्ज्ञांनी म्हटलं की, बांबूच्या तात्पुरते बांधकामामुळे आग वेगानं पसरली. दरम्यान, या घटनेसंदर्भात मोठी माहिती समोर येत आहे. बहुमजली इमारतींना लागलेल्या भीषण आगीत १२८ जणांचा मृत्यू झाला आहे.

प्राथमिक माहितीनुसार, ही भीषण आग न्यू टेरिटरीजमधील ताई पो येथील वांग फुक कोर्ट निवासी संकुलात लागली आहे. या संकुलात एकूण ८ टॉवर आहेत. प्रत्येकी ३१ मजली टॉवरला भीषण आग लागली. सुमारे २हजार फ्लॅटसमध्ये एकूण ४,८०० रहिवासी राहत असल्याची माहिती समोर आली आहे. आगीत अनेक जण होरपळून जखमी झाले आहेत. ढिगाऱ्यातून आणखी मृतदेह बाहेर काढण्यात येत आहे.

पोलिसांनी या प्रकरणात प्रेस्टीज कंस्ट्रक्शनचे ३ अधिकारी, २ संचालक आणि एका अभियांत्रिकी सल्लागाराला अटक करण्यात आली आहे. प्रेस्टिज कन्स्ट्रक्शन एक वर्षाहून अधिक काळ निवासी संकुलात नूतनीकरणाचे काम करत आहेत. पोलिसांनी सांगितले की, नुतनीकरणामुळे इमारती या संरक्षक जाळ्या तसेच प्लास्टिकनं वेढलेल्या होत्या. एका इमारतीवरील खिडक्या बांधकाम कंपनीने दुरूस्तीचे काम करताना फोमने सील केल्याचं त्यांना आढळले.

साऊथ चायना मॉर्निंग पोस्टच्या वेबसाईटनुसार, इमारतींमधील हॉलवे तसेच स्टायरोफोम यामुळे घरांमध्ये आग वेगाने पसरण्यास कारणीभूत ठरले असावेत, असा अंदाज व्यक्त करण्यात आला आहे. दरम्यान, कंपनीच्या कार्यालयातून कागदपत्रे, संगणक तसेच फोन जप्त करण्यात आला आहे. बुधवारी इमारतीला भीषण आग लागली. गुरूवारी सायंकाळी २४७ लोक बेपत्ता असल्याची नोंद झाली होती.

बेपत्ता लोकांची संख्या झपाट्याने वाढत चालली आहे. परंतु, या प्रकरणाबाबत अधिकाऱ्यांनी अद्याप नवीन आकडा जाहीर केलेला नाही. दरम्यान, इमारतीच्या नुतनीकरणासाठी आलेले कामगार बेपत्ता असून, त्यांचा देखील शोध घेतला जात आहे.