उत्तर प्रदेशातील देवरियामधून एक हृदयद्रावक घटना समोर आली आहे. याठिकाणी एका ६० वर्षीय व्यक्तीने बकरी ईदच्या दिवशी बकरीची कुर्बानी देण्याऐवजी स्वतःची कुर्बानी दिली. या व्यक्तीने स्वत:चा गळा चिरून आत्महत्या केली. गळा चिरण्यापूर्वी या व्यक्तीने एक पत्र देखील लिहिले आहे ज्यामध्ये त्याने स्वत:ची कुर्बानी देण्यामागचे कारण नमूद केले आहे. स्वत:चा गळा कापल्यानंतर हा माणूस जवळपास एक तास वेदनेने तडफडत राहिला, त्यानंतर त्याला गोरखपूर मेडिकल कॉलेजमध्ये नेण्यात आले. पण उपचारादरम्यान डॉक्टरांनी त्यांना मृत घोषीत केले.

मिळालेल्या माहितीनुसार, ही घटना देवरियाच्या गौरी बाजार पोलिस ठाण्याच्या हद्दीतील उधोपूर गावातील आहे. याठिकाणी राहणारा ६० वर्षीय ईश मोहम्मद याने ईदच्या दिवशी स्वत:ची कुर्बानी दिली. मोहम्मद ईद-उल-अजहाची नमाज अदा केल्यानंतर घरी आले. त्यानंतर त्यांनी घराबाहेर बांधलेल्या झोपडीत गळा चिरून आत्महत्या केली. सुमारे एक तास झोपडीत ईश मोहम्मद वेदनेने तडफडत होते. त्यानंतर कुटुंबातील सदस्यांना त्यांच्या ओरडण्याचा आवाज आला.

मोहम्मद रक्ताच्या थारोळ्यात पडले होते. हे दृश्य पाहून त्यांच्या कुटुंबीयांच्या पायाखालची जमीन सरकली. ईश मोहम्मदच्या कुटुंबीयांनी त्यांना ताबडतोब गोरखपूर मेडिकल कॉलेजमध्ये नेले. त्याठिकाणी त्यांच्यावर उपचार सुरू होते. पण प्रकृती गंभीर असल्यामुळे त्यांना पुढील उपचारासाठी बीआरडी मेडिकल कॉलेज गोरखपूर येथे पाठवण्यात आले. पण उपचारादरम्यान त्यांचा मृत्यू झाला. त्यांच्या मृत्यूमुळे कुटुंबीयांना मोठा धक्का बसला.

ईश मोहम्मदने आत्महत्या करण्यापूर्वी एक सुसाईड नोट देखील लिहिली होती. या नोटमध्ये त्यांनी लिहिले की,'लोक त्यांच्या घरामध्ये बकऱ्यांना आपल्या मुलासारखं पाळतात आणि नंतर त्यांची कुर्बानी देतात. तो देखील एक जिवंत प्राणी आहे. कुर्बानी तर माणसाची दिली पाहिजे. मी अल्लाह आणि त्याच्या पैगंबराच्या नावाने स्वतःची कुर्बानी देत आहे. मला कोणीही मारले नाही. मला शांततेत दफन करा आणि माझी कबर त्याच ठिकाणी बनवा जिथे खुंटी बांधली आहे. कोणाचीही भीती बाळगण्याची गरज नाही.'