हरियाणामधून एक काळीज पिळवटून टाकणारी घटना समोर आली आहे. गुरुग्राम येथे स्मशानभूमीची भिंत कोसळल्याने ढिगाऱ्याखाली दबून चार जणांचा मृत्यू झाला. तर 6 जण जखमी झाले आहेत. ही भयंकर घटना सीसीटीव्ही कॅमेऱ्यात कैद झाली असून घटनेचा व्हिडिओ सध्या माध्यमांवर व्हायरल होत आहे.

याबाबत सविस्तर माहिती अशी की, गुरुग्राममधील सायबर सिटीच्या मदनपुरी रोडवरील रामबाग परिसरात स्मशानाची भिंत कोसळून चार जणांचा दुर्दैवी मृत्यू झाला. तर या घटनेत ६ जण जखमी झाले आहेत. शनिवारी सायंकाळी 5.30 ते 6 च्या दरम्यान ही दुर्दैवी घटना घडली.

स्मशानभूमीलगत असलेल्या वसाहतीतील काही लोक शनिवारी सायंकाळी रामबाग भिंतीजवळ बसले होते. यावेळी तेथे काही मुले खेळत होती. अचानक स्मशानाची भिंत कोसळली आणि काही लोक व लहान मुले त्याखाली सापडली. घटना घडताच स्थानिक लोकांनी तातडीने ढिगारा उचलण्यास सुरुवात केली आणि ढिगाऱ्याखाली दबलेल्या लोकांना रुग्णालयात नेले.

उपचारादरम्यान पप्पू, कृष्णा, मनोज आणि निष्पाप मुलगी खुशबू यांचा मृत्यू झाला. तर इतर लोकांवर उपचार सुरू आहेत. या घटनेची माहिती मिळताच पोलिसांनी घटनास्थळ गाठून तपास सुरू केला. पोलिसांनी मृतदेह ताब्यात घेऊन शवविच्छेदनासाठी पाठवले असून संपूर्ण प्रकरणाचा सखोल तपास सुरू केला आहे.

व्हायरल झालेल्या व्हिडिओमध्ये तुम्ही पाहू शकता की, काही लोक भिंतीजवळ बसून बोलत आहेत, त्यानंतर अचानक भिंत कोसळली. लोक बेसावध असल्याने त्यांना पळण्याची संधीच मिळाली नाही, ज्यामुळे सर्व जण ढिगाऱ्याखाली दबले गेले.