महाराष्ट्राच्या शेजारच्या राज्यात म्हणजेच गुजरातमध्ये 4 तासांत भूकंपाचे मोठे धक्के बसले आहे. गुजरातमध्ये पुन्हा एकदा निसर्गाने कोप दाखवायला सुरुवात केली आहे. राजकोट जिल्ह्यातील उपलेटा परिसरात शुक्रवारी सकाळी एकापाठोपाठ 9 भूकंपाचे धक्के जाणवल्याने एकच घबराहट जाणवली. अवघ्या चार तासांत 9 वेळा जमीन हादरल्याने लोकांमध्ये एकच खळबळ उडाली आहे. एखाद्या मोठा भूकंप तर नाही येणार ना? या भीतीने लोक घराबाहेर येत पळून जाऊ लागले.

आज सकाळच्या सुमारास 6.19 मिनिटांनी भूकंपचा पहिला झटका बसला, याची तीव्रता रिष्टर स्केलवर 3.8 इतकी नोंदवण्यात आली. त्यानंतर लगेचच एका तासात सहा आणि पुढील चार तासांत एकूण नऊ धक्के बसले. या भूकंपाची तीव्रता 2.7 ते 3.8 च्या दरम्यान होती. फक्त उपलेटाच नाही तर धोराजी आणि जेतपूरमध्येही जमीनिखालून येणाऱ्या आवाजामुळे आणि कंपनांमुळे लोकांमध्ये भीतीचे वातावरण निर्माण झाले आहेत. खबरदारीचा उपाय म्हणून जेतपूरमधील शाळांना लगेचच सुट्टी जाहीर करण्यात आली.

भूकंप विज्ञान केंद्राने दिलेल्या माहितीनुसार, या सर्व भूकंपाचे केंद्रबिंदू उपलेटा शहरापासून साधारण 27 किमी अंतरावर होते. काल गुरुयारी रात्री 8.43 मिनिटांनी 3.3 तीव्रतेचा धक्का बसला होता. त्यानंतर शुक्रवारी एकामागून एक धक्के सुरूच राहिले. स्थानिक प्रशासन आणि महानगरपालिका पथकाने लगेचच उपलेटा परिसरात पोहोचले आणि नागरिकांना सतर्क राहण्याचे आवाहन केले.